Imyaka 7 ya Perezida KAGAME yabaye manda idasanzwe ku Ishyaka PSD.., na manda iri imbere ntisanzwe- Dr BIRUTA

  1. PSD izafata umurongo ku mukandida izashyigikira mu nama nkuru y’Ishyaka
  2. PSD; Ishyaka rya kabiri mu Rwanda nyuma RPF - INKOTANYI
  3. nta gikorwa cya Politiki cyabaye muri iki gihugu ishyaka rititabiriye
  4. Imyaka irindwi irangiye ya Perezida Kagame; manda idasanzwe kuri PSD

Mu gihe Ishyaka riharanira Demokarasi n’imibereho myiza y’abaturage (PSD) ryizihiza imyaka 25 rimaze rishinzwe, bihuriranye n’uko u Rwanda rugiye kwinjira mu matora y’umukuru w’igihugu.Ubuyobozi bw’iri shyaka buratangaza ko bwishimira iby’igihugu kimaze kugeraho by’umwihariko ibyagezweho muri iyi manda y’imyaka irindwi ya Perezida Kagame.

Ishyaka PSD ryashinzwe muri 1991 ririzihiza imyaka 25 rimaze ribayeho.Ibi birori yagombaga kubyizihiza umwaka ushize, ariko ngo ishyaka ryahisemo kubihuza n’umwaka usoza manda y’umukuru w’igihugu kuko bumva ari ibikorwa bibiri bikuru kandi ngo kubihuza bifite igisobanuro gifatika

Mu kiganiro cyihariye yagiranye na Makuruki.rw kuri uyu wa gatanu, Perezida w’Ishyaka PSD, Dr. Vincent Biruta (usanzwe ari Minisitiri w’umutungo kamere), yadutangarije ko ishyaka rigiye kwizihiza isabukuru y’imyaka 25 rihagaze neza.

Dr Biruta avuga ko kuva PSD yashingwa muri 1991 yahanganye n’ingoma y’igitugu ya MRND mbere ya 1994 ari na byo byayigizeho ingaruka muri Jenoside aho abari abayobozi baryo bose bishwe bigashegesha ishyaka ku buryo bukomeye, ariko icy’ingenzi bishimira nyuma y’imyaka 25 ngo ni uko uyu munsi ibyo u Rwanda rwagezeho mu myaka 23 PSD n’indi mitwe ya Politiki babigizemo uruhare.

Perezida w’ishyaka PSD asobanura ko nyuma ya 1994 Ishyaka PSD ryiyubatse mu nzego zose, kandi rigira uruhare mu nzego nk’aho ryari riri muri Guverinoma n’Inteko Ishinga Amategeko by’Inzibacyuho, ndetse na magingo aya iri shyaka riri mu nzego nkuru z’igihugu kugeza mu nzego z’ibanze.

Yagize ati "....nta gikorwa cya Politiki cyabaye muri iki gihugu ishyaka rititabiriye kandi uko umwaka utashye bikagenda bikorwa mu buryo bunoze, kandi ari ko twakomeje kubaka ingengamatwara y’ishyaka, dutanga amahugurwa mu rubyiruko., mu bagore, Ishyaka rirahari ryariyubatse kandi rirakomeza gutera imbere.”

Imyaka 7 irangiye ya Perezida Kagame yabaye Manda idasanzwe ku Ishyaka PSD

Umukuru w’Ishyaka PSD Dr. Biruta ashimangira ko PSD ari ryo shyaka rya kabiri rikomeye mu Rwanda inyuma ya FPR iri ku butegetsi. Barizihiza imyaka 25 bishimira uruhare rwabo mu byagezweho mu gihugu, dore ko PSD yagiye iyobora inzego zifata ibyemezo, aha ariko uyu muyobozi avuga ko aho igihugu kigeze ntawe ugomba kubirebera mu rwego rw’ishyaka gusa, ngo kuko ukurikije uko igihugu cyari kimeze muri 1994 byasabaga ubufatanye bw’inzego zitandukanye n’indi mitwe ya Politiki.

By’umwihariko ariko Dr. Biruta kuri we asanga iyi manda ya Perezida Kagame (2010-2017) yarabaye Manda idasanzwe ku ishyaka rya PSD, kuko bishimira uruhare bagize mu gushyira mu bikorwa gahunda Perezida Kagame yari yarasezeranyije abanyarwanda.

Ibi abihera ku kuba igice cy’imwe cy’iyi manda y’imyaka 7, Guverinoma yarayobowe na Murekezi Anastase umuyoboke w’ Ishyaka PSD mu gushyira gahunda y’imyaka 7 ya Perezida mu bikorwa. Aha ni ho uyu muyobozi avuga ko ari ikintu kidasanzwe muri iyi manda ishojwe.

PSD mu matora ya Perezida wa Repuburika ya 2017

Ku byitezwe na benshi, haribazwa niba n’andi mashyaka ya Politiki akorera mu Rwanda azatanga abakandida bazahatana na Perezida Kagame. Mu Ishyaka PSD mu ijwi rya Perezida wayo yavuze ko ibyo bizatangwaho umurongo n’inama nkuru y’ishyaka iteganyijwe kuri uyu 03 Kamena 2017. Aha ni ho abanyamuryango bazemeza ukwiye kurihagarira cyangwa niba hari undi ishyaka rishobora gushyigikira.

“…Itegeko Nshinga n’amategeko agenga imitwe ya politiki ateganya ko imitwe ya politiki yemerewe kwitabira ibikorwa by’amatora., kwamamaza n’ibindi, natwe ubu ngubu rero twitegura amatora y’umukuru w’igihugu, dufite inama nkuru y’ishyaka ejo ni yo izafata umwanzuro ku gikwiye gukorwa.., gusa icyo nemeza cyo ni uko ishyaka rigomba gufata umurongo, rigomba kugira umukandida. Kugira umukandida biri mu buryo bwinshi hashobora kugira umuyoboke w’ishyaka cyangwa ishyaka rikavuga riti reka tugutange uduserukire.., cyakora na none amategeko ateganya uburyo bwinshi bushobora no gufatanya n’indi mitwe ya Politiki bibaye ngombwa tugashyigikira umukandida umwe, ibyo byose turabyemerewe ni byo kongere y’Ishyaka izafataho umwanzuro, byombi rero birashoboka”.

N’ubwo Dr. Biruta atangaza ko ubu buryo bwombi bushoboka, asobanura ko ibizagenderwaho bizaterwa n’impamvu cyangwa uburyo ubu n’ubu. Icyo yise context. Ngo Iyi “context” ishobora no gushingira ku buryo abanyarwanda basabye muri referandumu ku bwinshi ndetse n’Ishyaka PSD rikayishyigikira.

“…Ibyo nita context na none iyi manda irangiye navuga ko idasanzwe kuko igice cyimwe cy’iyi manda Minisitiri w’Intebe wayoboraga ishyirwa mu bikorwa bya Guverinoma ni umuyoboke wa PSD.., ibyo nibyo nita context. Manda irangiye ntabwo ari manda isanzwe kuko hari igice kimwe Minisitiri w’Intebe yayoboye aturuka muri PSD,na manda iri imbere ni abaturage bayisabye, bafite ibyo batubwira…, ibyo byose muri bwa burenganzira bahabwa n’amategeko , muri bwa burenganzira bw’imitwe ya Politiki no mu cyerekerezo cy’umutwe wa politiki n’ibyifuzo ufitiye igihugu, urabifata ukabishyira muri ya context navugaga bikavamo umurongo.... twatanga umukandida bwite w’Ishyaka cyangwa twavuga ngo dushingiye ku byo abaturage basabye tukaba twatanga umukandida bwite w’ishyaka cyangwa twashigira kuri ya context twavugaga tukaba twashyigikira undi”.

Aha uyu muyobozi avuga ko ibi ari byo Kongere izafataho umurongo mu nama yo kuri uyu wa Gatandatu.

Kongere y’Ishyaka PSD izaterana kuri uyu wa 03 Kamena 2017 ari nabwo hateganyijwe ibirori byo kwizihiza isabukuru y’imyaka 25 ishyaka rimaze, aho binitezwe ko iri shyaka ari bwo riza gutangaza umukandida uzarihagarira cyangwa rizashyigikira mu matora y’umukuru w’igihugu ategerejwe muri Kanama uyu mwaka.

Ishyaka riharanira Demokarasi n’imibereho myiza y’abaturage PSD ryashinzwe mu Nyakanga 1991 mu nkubiri y’amashyaka menshi, rikaba ryararwanyije ryivuye inyuma ingoma ya MRND na Habyarimana Juvenal ku buryo bweruye rifatanyije n’andi mashyaka ataravugaga rumwe na MRND.

PSD yagize uruhare rutaziguye mu mishyikirano y’amahoro y’Arusha, ryanagize abanyapolitiki bakomeye mbere ya 1994 barimo Nzamurambaho Ferederiko, Gatabazi Feliciyani, Ngago Felicien n’abandi.

Nyuma ya Jenoside PSD yabaye Ishyaka ryayoboye Inteko Ishinga amategeko imitwe yombi mu bihe bitandukanye, ndetse kuri ubu Anastase Murekezi umuyoboke waryo niwe uyoboye Guverinoma, ndetse rikaba rifatwa nk’ishyaka rya kabiri mu gihugu nyuma y’Umuryango RPF – INKOTANYI.

Umuyobozi wa PSD avuga ko Ishyaka rikomeje gukura no kwaguka kandi ngo ryunguka abanyamuryango umunsi ku munsi. Dr. Biruta vuga ko n’ubwo bishimira ibyo bagezeho muri iyi myaka urugendo rugikomeje ku bufatanye n’indi mitwe ya Politiki, dore ko basatira icyerezo 2020 igihugu cyari cyarihaye, bityo nka PSD biteguye gukomeza gutegura urubyiruko ari zo mbaraga z’ejo hazaza bityo batangire no gutekereza ku cyerekezo 2050. Ibi ngo bikorwa hategurwa urubyiruko rw’Ishyaka rutozwa kandi rugahurirwa kuzavamo abanyapoitiki beza.

Yisangize Inshuti.

Ibitekerezo

Tanga Igitekerezo