Warning: imagejpeg(local/cache-vignettes/L463xH309/arton11512-e00c0.jpg.tmp): failed to open stream: Disk quota exceeded in /home/makuruki/public_html/ecrire/inc/filtres_images_lib_mini.php on line 435
Imibereho y’abarinzi b’igihango yashyizwe mu maboko y’uturere .|. Makuruki.rw | Amakuru Asesenguye!

Imibereho y’abarinzi b’igihango yashyizwe mu maboko y’uturere

Fidele Ndayisaba, umunyamabanga nshingwabikorwa muri NURC

Mu nama yahuje komisiyo y’ubumwe n’ubwiyunge n’inzego zitandukanye zigize umujyi wa Kigali igamije gutegura igikorwa cyo gutora abarinzi b’igihango kuri uyu wa 21 Nyakanga 2016, komisiyo y’igihugu y’ubumwe n’ubwiyunge yavuze ko abarinzi b’igihango bazatorwa mu turere nta gihembo bazahabwa ariko ko uturere bazaba batorewemo tugomba kujya dukurikirana imibereho yabo by’umwihariko abakeneye ubufasha bakabuhabwa.

Ku nshuro ya kabiri hagiye kuba igikorwa cyo gutora abanyarwanda n’abanyamahanga babaye abarinzi b’igihango (bagaragaje ibikorwa by’indashyikirwa by’ubumwe n’ubwiyunge).

Iki gikorwa cyo gutora abarinzi b’igihango gitegurwa n’Umuryango wa Unity Club ufatanyije na Komisiyo y’Igihugu y’Ubumwe n’ubwiyunge, kikaba gifite intego yo kumenya ibikorwa by’indashyikirwa byakozwe mu bumwe n’ubwiyunge n’ababikoze, kugaragariza umuryango abakoze ibikorwa by’indashyikirwa, kubashimira n’ibindi bitandakanye.

Umunyamabanga Nshingwabikorwa wa Komisiyo y’Igihugu y’Ubumwe n’ubwiyunge, Fidele Ndayisaba, yavuze ko n’ubwo abarinzi b’igihango nta gihembo runaka bazahabwa, ariko ngo bazajya bitabwaho n’uterere batuyemo mu rwego rw’imibereho myiza.

Yagize ati “Umurinzi w’igihango agomba kuba umuntu w’intangarugero mu myitwarire no mu bikorwa bimuranga, ariko no mu mibereho ye. Icyo ubuyobozi bw’akarere busabwa ni ugukurikirana niba wa murinzi w’igihango afite imibereho myiza abera abandi urugero mu mibereho myiza no mu myitwarire, niba hari ubufasha yabuhabwa kugira ngo arusheho no kuba intangarugero mu mibereho myiza ibyo bigomba kwitabwaho mu mibereho myiza.”

Ndayisaba kandi yavuze ko ubwo hatorwaga abarinzi b’igihango kuva mu kagari kugera mu rwego rw’umurenge n’akarere, bitakozwe neza cyane kuko ngo batigeze batangazwa gusa ngo muri uyu mwaka bigiye kunozwa.

Yagize ati “Umwaka ushize, abari batoranijwe ku rwego rw’akagari, umurenge n’akarere ntibemejwe ngo batangarizwe Inteko zibishinzwe kuko byagaragaye ko hari ibikeneye kunozwa, byagaragaye ko byakozwe abantu batateguwe neza ku buryo hari amakuru byagiye bigaragara ko afite ibyuho. Uyu mwaka rero amakuru yatwanzwe azongera ashishozwe neza abantu bizere ko nta waba yibagiranye cyangwa se niba hari uwagiye ku rutonde hari ibyo atujuje.”

Abarinzi b’Igihango bazashimirwa ni abakoze ibikorwa by’indashyikirwa bishyigikira isano muzi y’abanyarwanda kuva mu 1990 kugera 2016, bakaba bazatorwa ku rwego rw’akagari, umurenge, akarere, diaspora ndetse no ku rwego rw’igihugu.

Kuba umurinzi w’Igihango ntibirebera imyaka y’umuntu cyangwa se kuba ariho cyangwa yarapfuye. Ashobora kwamburwa kuba umurinzi w’igihango mu gihe yaba agaragaje imyitwarire itari myiza.


Fidele Ndayisaba, umunyamabanga nshingwabikorwa muri NURC


Inzego z’umutekano nazo zari zitabiriye inama


Abahagarariye amadini nabo bari bitabiriye inama

Mu mwaka ushize hatowe abarinzi b’igihango 17 barimo abakiriho n’abapfuye hakaba hari higanjemo ababaga mu bigo by’abihaye Imana.

Yisangize Inshuti.

Ibitekerezo

Tanga Igitekerezo