Ikigo cy’igihugu gishinzwe umutungo kamere cyaburiye abiyitirira amasambu atabanditseho.

Uwase Francine umukozi w’ikigo cy’igihugu cy’umutungo kamere mu Rwanda mu bubiko bw’impapuro mpamo

Ubwo abakozi b’ikigo cy’igihugu gishinzwe umutungo kamere basuraga akarere ka Gicumbi hagamijwe gukemura ibibazo bishingiye ku butaka cyane cyane ku iyandikisha ryabwo, abaturage bo mu murenge wa Rwamiko bagaragaje ibibazo bitari bike bafite ku masambu maze basabwa kugira uruhare mu kwiyandikishaho ubutaka ngo babone kwizera ko ari ubwabo.

Nyuma ya gahunda yo kwandikisha ubutaka yatangiye mu mwaka wa 2013, bamwe mu baturage basigaranye ibibazo bitandukanye ku masambu yabo. Ibi bikaba ari byo byatumye kuva tariki ya 23 Gicurasi uyu mwaka hirya no hino mu gihugu hatangizwa icyumweru cyahariwe gusobanurira abaturage ibijyanye n’imikoreshereze y’ubutaka.

Kuri iki cyumweru mu karere ka Gicumbi hari hatahiwe umurenge wa Rwamiko, aho abaturage batari bake bagaragaje ibibazo bafite ku masambu ngo abakozi b’ikigo gishinzwe umutungo kamere babihe ubugororangingo.

Umwe mu baturage yagaragaje ikibazo cy’uko isambu ye itabonye ibyangombwa bitewe n’uko mukuru we ngo yayimwambuye akayigurisha igahita ishyirwa mu masambu ari mu makimbirane nyamara we ngo yumva ko atari ko byari bikwiye kugenda.

Yagize ati: "Iki kibazo cy’ibipapuro by’isambu njyewe baje kuntwara isambu, nyuma tumaze kugabana n’umuryango naranashushanyishije, muruku wanjye araza arayitwara aranayigurisha, baca ruhinga nyuma bandikishamo amakimbirane kandi sinigeze mburana na bo”.

Uyu muturage yagiriwe inama yo kugana abunzi kuko ngo nubwo we abona ko nta makimbirane isambu ye ifite, ngo kuba hari uwayimwambuye bituma iba mu makimbirane, bityo bamusaba kugana abunzi akabitangira ikirego yayitsindira bakazayimuhera ibyemezo.

Si iki kibazo gusa cyahawe ubugororangingo, kuko n’abandi baturage bari bafite ibibazo byahawe inzira bigomba gukemukiramo.

Ikigo cy’igihugu gishinzwe umutungo kamere kikaba cyaboneyeho gusaba abaturage batari biyandikishaho ubutaka bwabo kubikora byihuse, kuko ngo ubutaka batiyandikishijeho ngo babe babufitiye n’icyemezo nta mpamvu yo kubwita ubwabo, nk’uko byatangajwe na Uwase Francine umukozi w’ikigo cy’igihugu cy’umutungo kamere mu Rwanda mu bubiko bw’impapuro mpamo, akaba anashinzwe iyandikisha ry’ubutaka mu ntara y’Amajyaruguru.

Yagize ati:” Icyo nabashishikariza, ni ukwandikisha impinduka nkuko tubivuga abaturage bakamenya ibyo basabwa kugira ngo bandikishe amakuru mashya kuko igihe cyose utunze ubutaka butakwanditseho, twagiye tubigarukaho ntabwo aba ari ubwawe, bitabire kumenya ibisabwa kugira ngo ubone amakuru ajyanye n’igihe kuko nitubika amakuru atajyanye n’igihe, bya bindi twakoze bizasa nkaho ari impfabusa kandi na none nawe bwa burenganzira ku butunzi usange ntabwo ufite mu by’ukuri, ndagira ngo mbashishikarize kwandikisha impinduka zose zabaye ku butaka”.


Abaturage batuye umurenge wa Rwamiko bagaragaje ibibazo bafite ku mikoreshereze y’ubutaka umwe ku wundi.

Ubutaka ni kimwe mu bintu bikomeje kugenda bitera amakimbirane hirya no hino mu gihugu kuko mu bibazo bikunze kugaragara mu nkiko zitandukanye usanga ari bwo bushingiyeho nk’uko abunzi twasuye mu minsi ishize babidutangarije.

NDARISABAMUNGU Paul Clement
MAKURUKI.RW

Yisangize Inshuti.

Ibitekerezo

Tanga Igitekerezo