Igiswayire cyemejwe nk’ururimi rw’ubutegetsi mu Rwanda

Ururimi rw’Igiswayire rwemejwe nk’ururimi rwa Kane rugomba kujya rukoreshwa mu butegetsi, mu Rwanda.

Inama y’abaminisitiri yateranye kuri uyu wa Gatatu niyo yemeje ko Igiswayire kijya ku rutonde rw’indimi zemewe gukoreshwa mu butegetsi bw’u Rwanda.

Ubusanzwe Itegeko Nshinga rya Repubulika y’u Rwanda ryavuguruwe mu mwaka wa 2015, ryemeje ko Ururimi rw’Ikinyarwanda ruba ururimi rw’igihugu, mu gihe Ikinyarwanda, Icyongereza n‟Igifaransa zari zemewe nk’indimi zikoreshwa mu butegetsi.

Ingingo ya munani y’Itegeko Nshinga ivuga ko Itegeko Ngenga rishobora kongera cyangwa kugabanya indimi zemewe mu butegetsi.

Indimi z’ubutegetsi nizo zifashishwa zandikwamo inyandiko za Leta, ndetse ni nazo zigishwa mu mashuri.

Mu mashuri Igiswayire cyatangiye kwigishwa guhera mu mwaka wa mbere w’amashuri yisumbuye, nubwo hari aho bagisimbuza Igifaransa.

Mu nteganyagisho yatangiye gukurikizwa uyu mwaka, Igiswayire n’Igifaransa zashyizwe mu masomo azajya yigishwa mu mashuri abanza, kandi zizajya zinabazwa mu bizamini bya Leta.

Ururimi rw’Igiswayire nirwo rurimi ruvugwa cyane mu Muryango wa Afurika y’Iburasirazuba, akaba ari n’ururimi rukoreshwa nk’ururimi rw’uwo muryango.

Urwo rurimi kandi nirwo rwanditswemo indirimbo yubahirize EAC.

Yisangize Inshuti.

Ibitekerezo

Tanga Igitekerezo