Icyo amategeko avuga ku gusimbuza abadepite bahawe izindi nshingano

Bamporiki Edouard (iburyo) na Gatabazi JMV bari abadepite bakaba bahawe imirimo mishya

Nyuma yo gutangaza abagize Guverinoma nshya, ubu hari imyanya ibiri y’abadepite mu Nteko ishinga amategeko bagomba gusimbura abahawe izindi nshingano nshyashya.

Abo bari abadepite bahawe izindi nshingano ni Bamporiki Edouard, wagizwe Perezida w’Itorero na Gatabazi Jean Marie Vianney, wagizwe Guverineri w’Intara y’Amajyaruguru bari basanzwe ari abadepite, ibi bivuze ko imyanya yabo igomba guhabwa abandi babasimbura mu mirimo y’ubudepite.

Nkuko ingingo ya 78 y’itegeko nshinga rya Repubulika y’u Rwanda ibiteganya, Umudepite uvuye mu mwanya, asimburwa hakurikijwe ibiteganywa n’Itegeko Ngenga rigenga amatora.

Itegeko ngenga rigenga amatora rivuga iki?

Ingingo ya 106 y’itegeko Ngenga rigenga amatora ivuga ku isimburwa ry’umudepite, ivuga ko iyo ku mpamvu iyo ariyo yose, Umudepite watorewe ku ilisiti y’Umutwe wa Politiki cyangwa Ishyirahamwe ry’Imitwe ya Politiki avuye mu murimo we w’Ubudepite, Perezida w’Umutwe w’Abadepite abimenyesha Komisiyo y’Igihugu y’Amatora mu gihe kitarenze iminsi icumi (10) kugira ngo itangaze amazina y’Umudepite usimbura.

Kumusimbura bikorwa hakurikijwe uko abakandida bakurikirana ku ilisiti, usimbura akaba ari umukandida uhita akurikira Umudepite watowe nyuma kuri iyo lisiti.

Komisiyo y’Igihugu y’Amatora igomba kuba yatangarije Abanyarwanda amazina y’Umudepite mushya mu gihe kitarenze iminsi irindwi (7) uhereye igihe Perezida w’Umutwe w’Abadepite abiyimenyesheje.

Ibi bivuze ko ikigiye gukurikiraho ari uko Perezida w’umutwe w’abadepite azamenyesha Komisiyo y’amatora (NEC) ko hari abadepite bagomba gusimbuzwa hanyuma NEC na yo igatangaza amazina y’abagomba gusimbura abo bavuye mu myanya.

Bigenda bite iyo kuri Lisiti nta bantu bariho bahagije bo gusimbura abadepite bavuye mu nshingano?

Iyi ngingo ya 106 ikomeza ivuga ko "Iyo ari Umutwe wa Politiki washeshwe, umwe cyangwa benshi mu Badepite bawo beguye, kandi nta musimbura uri kuri lisiti,hakoreshwa andi matora yo gusimbura Abadepite batari mu myanya yabo mu gihe kitarenze iminsi mirongo cyenda (90)."

Ubusanzwe abadepite batorerwa manda y’imyaka itanu (5) ariko bakaba bashobora kongera gutorerwa izindi manda.

Umudepite ashobora kuva mu nshingano z’ubudepite yeguye mu Mutwe w’Abadepite; yirukanywe mu Mutwe w’Abadepite; asezeye mu mutwe wa politiki yatorewemo, yirukanywe mu mutwe wa politiki yatorewemo, mu buryo buteganywa n’Itegeko Ngenga ryerekeye imitwe ya politiki; iyo icyemezo cy’iyandikwa ry’umutwe wa Politiki yatowe aturutsemo giteshejwe agaciro; agiye mu wundi mutwe wa politiki; apfuye; cyangwa agize impamvu imubuza burundu kurangiza inshingano ze.

Yisangize Inshuti.

Ibitekerezo

Tanga Igitekerezo