Ibyo amabwiriza mashya ya NEC abuza abakandida n’abazabamamaza mu matora ya Perezida

1

Prof Kalisa Mbanda uyobora NEC ni we washyize umukono kuri aya mabwiriza mashya

Komisiyo y’igihugu y’Amatora iherutse gutangaza amabwiriza mashya agenga itora rya Perezida wa Repubulika ryo mu 2017, muri ayo mabwiriza harimo ibikorwa bibuzanyijwe haba ku biyamamariza kuba Perezida no kubazabamamaza.

Aya mabwiriza n0 02/2017 yo ku wa 31/05/2017 ahindura kandi yuzuza amabwiriza n0 01/2017 yo ku wa 04/04/2017 ya komisiyo y’igihugu y’amatora agenga itora rya Perezida wa repubulika mu 2017.

Aya mabwiriza mashya yo kuwa 31 Gicurasi 2017 yasohotse nyuma y’impaka ndende zakuruwe n’amabwiriza ya mbere yo kuwa 04 Mata 2017 yasabaga abakandida mu matora ya Perezida kubanza guha NEC ubutumwa bashaka kunyuza ku mbuga nkoranyambaga mbere yo kubunyuzaho.

Icyakora noneho muri aya mabwiriza mashya, mu ngingo yayo ya karindwi yemerera abakandida gukoresha imbuga nkoranyambaga. Gusa ariko nubwo izi mbuga zemewe gukoreshwa birabujijwe kwiyamamaza cyangwa kwamamaza hakoreshejwe imbugankoranyambaga za Leta n’iz’ibindi bigo bigamije inyungu rusange.

Ingingo ya gatanu y’aya mabwiriza yemerera abakandida n’ababamaza kumanika amafoto yabo cyangwa inyandiko ku karubanda ariko iyi ngingo mu gika cya gatatu n’icya kane inagaragaza ahantu batemerewe kuyamanika.

Ibyo bika biragira biti: "Icyakora, birabujijwe kumanika ibyamamaza umukandida ku mavuriro, ku mashuri, ku nsengero, no ku nkingi z’amashanyarazi.

Abakandida bagomba gukangurira ababashyigikiye kwirinda guca, kwangiza no gusibanganya ifoto y’undi mukandida n’ikindi cyose kimwamamaza."

Ibindi bibujijwe abakandida n’ababashyigikiye mu bihe by’amatora

Ingingo ya 6 y’ama mabwiriza ni yo igaragaza urutonde rw’ibintu abakandida ndetse n’ababamamaza babujijwe gukora.

Dore uko iyo ngingo ivuga: "Ibikorwa bibujijwe mu gihe cyo kwiyamamaza cyangwa kwamamaza
Ingingo ya 37 y’Amabwiriza n0 01/2017 yo ku wa 04/04/2017 ya Komisiyo y’Igihugu y’Amatora agenga itora rya Perezida wa Repubulika mu 2017 ihinduwe kandi yujujwe mu buryo bukurikira: Birabujijwe mu gihe cyo kwiyamamaza cyangwa kwamamaza:
1) gukoresha umutungo wa Leta aho waba uri hose, mu buryo bunyuranyije n’amategeko;
2) gutuka cyangwa gusebya undi mukandida, mu buryo ubwo ari bwo bwose;
3) gutanga impano, ruswa cyangwa kwakira ruswa;
4) gushingira ku bwoko, ku isano-muzi, ku karere, ku idini no ku bundi buryo bwose
bushingiye ku ivangura n’amacakubiri;
5) gukora cyangwa kuvuga icyahungabanya amahoro, ubumwe n’umutekano rusange
by’Abanyarwanda;
6) kwiyamamaza mu gihe kitagenwe n’amategeko n’amabwiriza agenga amatora;
7) guca, kwangiza, gusibanganya ifoto y’undi mukandida n’ikindi cyose kimwamamaza;
8) kwiyamamariza ahantu hatamenyeshejwe ubuyobozi nk’uko biteganywa n’amategeko
n’amabwiriza;
9) guhamagarira abaturage gukora igikorwa icyo ari cyo cyose n’imyifatire yose byatuma amatora atagenda neza.

Amatora nyirizina ateganyijwe ku wa 03 Kanama 2017 ku banyarwanda baba mu mahanga ndetse no kuwa 04 Kanama 2017 ku banyarwanda baba mu Rwanda.

Kugeza ubu Ishyaka PL, PSD na PDI yamaze gutanga Paul Kagame nk’umukandida uzayahagararira mu gihe Green Party yatanze Dr Frank Habineza kuba ari we uzarihagararira.

Abashaka kuba abakandida bigenga kuri ubu ni batatu ari bo Dianne Rwigara, Philippe Mpayimana na Mwenedata Gilbert.

Yisangize Inshuti.

Ibitekerezo 1

Tanga Igitekerezo