Ibyo Perezida Kagame yemereye abahanzi birimo kwigwaho n’abazabigeza ku nama y’abaminisitiri

1

Minisitiri w’imari n’igenamigambi Amb Gatete Claver yavuze ko imikono, imyidagaduro n’ubugeni ari bimwe mu bintu bikomeye byagaragaye ko bishobora guteza imbere ubukungu bw’igihugu, bityo ngo amaminisitiri batandukanye barimo kwiga no kunoza uburyo budasanzwe bwo gufasha ababikora kugirango bigire uruhare mu guteza imbere ubukungu bw’igihugu.

Tariki ya 27 Gicurasi 2017, Umukuru w’igihugu cy’u Rwanda Paul Kagame yakiriye Intore z’Imparirwakubarusha zigizwe n’abakina imikino itandukanye, Indatabigwi zigizwe n’abahanzi n’abanyabugeni, n’Impamyabigwi zigizwe n’abanyamakuru, bose bakaba bari bageze ku 2000.Icyo gihe bamugaragarije bimwe mu bibazo n’imbogamizi zugarije iterambere ryabo.

Icyo gihe Perezida Kagame yashimye intambwe abafite impano mu Rwanda bamaze kugeraho nubwo baba birwarije nta nkunga Leta ibagenera. Ati: “Impano dufite mu buhanzi, mu mikino no mu guhana amakuru, ni urugero rutwereka ibishoboka […] Mu mpano zitandukanye dufite iwacu, hari byinshi twageraho mu ruhando mpuzamahanga,….. Imirimo mukora y’ubuhanzi, gukina no gutangaza amakuru, igira uruhare runini mu iterambere ry’u Rwanda, Ni mu rwego rw’igihugu kumva ko abo bantu iyo bafite ubushobozi bagomba guterwa inkunga kugira ngo bagere kure aho bishoboka.”

Kuri uyu wa 08 Kamena, Ubwo Minisitiri w’imari n’igenamigambi Amb Gatete Claver yagezaga ku nteko ishinga amategeko Umushinga w’itegeko rigena ingengo y’imari ya 2017/2018, yavuze ko ibyo abahanzi babajije Perezida wa Repubulika ubwo bahuraga byose birimo kwigwaho kugirango barebe uko babafasha kuko Minisitiri Gatete avuga ko imyidagaduro ari urwego rukomeye cyane mu kuzahura ubukungu bw’igihugu.

Agaruka ku kamaro k’imyidagaduro mu kuzahura ubukungu, Minisitiri Gatetet yagize ati: “ Ruriya ni uruganda rukomeye cyane, imyidagaduro ubundi ni yo izana amafaranga menshi,..Imyidagaduro mu by’ukuri mu kuzahura ubukungu ni urwego nubwo rutarakura cyane(mu Rwanda) ariko rugenda ruzamuka tugomba guha ibyangombwa byose bikenewe, turacyabyigaho kugirango turebe ukuntu uru rwego rwose rwafashwa.”

Yakomeje agira ati: “Imyidagaduro igira uruhare runini ku rwego rwa serivise, kandi mu bihugu byinshi cyane igira akamaro kenshi cyane, ngirango mubona yuko nk’ubungubu iyo mufite abantu bazi kuririmba, abantu bazi gukora ibintu bitandukanye by’ubugeni, ujya kubona ukabona n’abantu bo mu karere na bo baje, amafaranga basiga mu gihugu ntagira ingano, imyidagaduro ni uruganda rukomeye, urebye nka California yateye imbere cyane cyane kubera imyidagaduro, turashaka kubafasha bose, abantu bafite impano bagomba gufashwa, turimo kubyigaho.”

Yatanze ingero zirimo igihugu cya Nigeria, avuga ko imyidagaduro ari kimwe mu byateje imbere iki gihugu. Minisitiri Amb Gatete yavuze ko nyuma yuko Perezida Kagame abemereye kubafasha bakiteza imbere, inzego bireba zirimo kubyigaho no kubinoza hanyuma inama y’abaminisitiri ikazaterana ikiga uko bafashwa guteza imbere impano zabo.

Ati: “Uko Perezida Kagame yabibemereye ni na ko inzego za Leta zibishinzwe zirimo kubisuzuma nyuma tuzafata ingamba zizemezwa n’inama y’abaminisitiri uburyo tugomba kubafasha.”

Yavuze ko ibijyanye no kubaka sitade y’imikino i Gahanga ndetse no kubaka ahantu hisanzuye ho kugaragariza umuco w’igihugu (Cultural Villag) birimo kwigwaho kandi bizarangira vuba ndetse bikazashyirwa mu bikorwa bikimara kwemezwa.

Stade y’I Gahanga izaba iri ku rwego ruhambaye kuko izaba yakira abantu ibihumbi 40, mu gihe yaba yuzuye yaba ari yo stade ya mbere nini iri mu gihugu, nyuma ya Stade Amahoro yakira hafi ibihumbi 30.


Minisitiri Gatete ubwo yagezaga ku nteko umushinga w’itegeko rigena ingengo y’imari 2017/2018



Abahanzi, abakinnyi n’abanyamakuru ubwo bahuraga na Perezida Kagame kuwa 27 Gicurasi 2017.

Yisangize Inshuti.

Ibitekerezo 1

  1. ibyo nda byishimiye cyane
    ariko ikindi kibazo batange nubwisanzure kubahanzi nimpvu industry nyarwanda idatera imbere ibintu byose babiha limit yaba muma film nyarwanda cg muma video clip yindirimbo haraho mwari mwabonamo pandagali ahubwo usanga abantu bakunda ibyohanze bagapinga ibyiwacu abanyarwanda babonye ubwisanzure bakabona ninkunga ihagije muri Africa ntawatujya inyu koku mubintu byose baragerageza

Tanga Igitekerezo