ISESENGURA: Ibyari byitezwe n’ibyatunguranye muri Guverinoma

Nyuma y’iminsi 13 Perezida Paul Kagame arahiriye kongera kuyobora imyaka 7 irindwi, icyari kitezwe ni Guvernoma nshya n’izindi mpinduka mu buyobozi bukuru mu butegetsi nyubahirizategeko, aho hari hitezwe impinduka n’amaraso mashya y’amwe mu masura abisimburana n’abasohoka muri Guverinoma.

Aho Umukuru w’igihugu Paul Kagame yanyuze yiyamamaza mu turere tw’igihugu twose hari byinshi yasezeranyije abaturage, no kongera umuvuduko na vitessi mu bikorwa by’Iterambere, guha amahirwe urubyiruko n’abagore byose bigamije gukomeza ibyagezweho no gukomereho umuvuduko.

Bimwe mu byari byitezwe

Nkuko byagenze mu mwaka wa 2010, hari hitezwe ko abagiriwe icyizere mu kuyobora ibikorwa byo kwamamaza (Campaign managers) umukandida wa FPR Inkotanyi bica amarenga ko bashobora kuzagaragara mu myanya mikuru.

Nkuko byagendekeye Fidele Ndayisaba wari Ushinzwe kwamamaza Umukandida Paul Kagame muri 2010 ubwo nyuma gato yo gusoza icyo gikorwa neza, yahawe (binyuze mu matora) kuba Umuyobozi w’umujyi wa Kigali avanywe mu majyepfo y’u Rwanda aho yari Guverneri.

Ibi ni na ko byagendekeye benshi muri bari bayoboye ibikorwa byo kwiyamamaza mu kwiyamamaza guheruka kw’Umukandida Paul Kagame, kuko bazirikanywe mu myanya yatanzwe n’Umukuru w’igihugu Paul Kagame mu bubasha ahabwa n’amategeko.

Julienne Uwacu yagarutse muri Guverinoma ku mwanya wa Minisitiri w’Umuco na Siporo mu gihe hari abatekerezaga ko iyi minisiteri yarikenewemo amaraso mashya.

Nubwo Uwacu atavanywe muri MINISPOC ariko amaraso mashya yajemo kuko yahawe Umunyamabanga Uhoraho mushya (PS) Bwana Ntigengwa John wasimbuye Lt Col Rugambwa Patrice utari umazeho kabiri.

Jean Philbert Nsengimana umwe mubari bashinzwe kwamamaza umukandida Paul Kagame na we yagarutse muri Guverinoma. Ahabwa Minisiteri yihariye aho urubyiruko rwatandukanyijwe n’Ikoranabuhanga.

Gatabazi Jean Marie Vianney wamamaje yivuye inyuma umukandida Paul Kagame hose mu gihugu, benshi bari biteze ikizakurikira imbaraga yashoye n’ubushake yagaragaje mu kwamamaza umukandida.

Uwavuga ko Kwamamaza umukandida Paul Kagame biri mu byatumye Gatabazi atoranywa mu bashingamategeko 80 akagirwa Guverneri ntiyaba agiye kure y’ukuri.


Imbaraga n’ishyaka bya Honorable Gatabazi JMV ntibyapfuye ubusa

Bamporiki Edouard na we ni umwe mu bakoze iyo bwabaga mu kwamamaza Paul Kagame cyane cyane mu Turere twa Nyamasheke na Rusizi, ndetse aba umwe mu bayoboye ibirori byo kwishimira intsinzi ya Paul Kagame mu ijoro ryo kuwa 04 Kanama 2017.

Hari hitezwe ko ashobora kwinjira muri Guvernoma nshya. Ni ubwo atagaragaye muri 33 bagize Guvernoma, uyu mudepite w’imyaka 34 yahawe ishingano zo kuba Perezida w’itorero ry’igihugu akoze mu ngata Rucagu Boniface wari umaze imyaka 10 kuri uyu mwanya uri ku rwego rwa Minisitiri nkuko Itangazo ry’ibiro bya Ministiri w’intebe ribivuga.

Uwamariya Odette uri mubari bashinzwe kwamamaza umukandida Paul Kagame akaba umwe mu bayoboye ibirori by’intsinzi n’irahira rya Paul kagame na we ntiyibagiranye aho yazamuwe mu ntera akagirwa Umuyobozi Mukuru mu biro bya Minisitiri w’Intebe.

Nyuma y’ishyirwaho rya Minisitiri w’Intebe mushya, Ngirente Edouard, Perezida Kagame yashimiye uwari ucyuye igihe Murekezi Anastase ko yakoze neza, ndetse amwizeza izindi nshingano.

Benshi bibazaga ko ashobora kuba yaza muri Guvernoma nshya nk’umuminisitiri usanzwe, icyari gufatwa nko kumanurwa mu ntera muri Guvernoma yari amaze imyaka hafi ine ayoboye.

Icyaje gutungurana ni ukuba Murekezi Anastase yagizwe Umuvunyi Mukuru asimbuye Aloyisia Cyanzayire wari umaze iminsi 60 gusa yongerewe manda n’Inama y’abaminisitiri yateranye kuwa 30 Kamena 2017.


Cyanzayire Aloysia ashobora kuba ari umwe mubatunguwe bikomeye nyuma y’amezi abiri gusa yongerewe manda

Indi mpinduka zatunguranye ni kuri Madamu Kazayire Judith wari wagizwe Guverneri w’Intara y’Iburasirazuba utamazeho umwaka, who yagiye avanywe ku mwanya w’Umuyobozi w’Umujyi wa Kigali wungirije ushinzwe imibereho myiza.

Amaraso mashya y’urubyiruko abisikana n’abari barambye muri Guvernoma

Muri guvernoma nshya igizwe na 40,6 % by’abagore yiganjemo abayobozi bakiri bato, barangajwe imbere na Minisitiri w’Intebe Ngirente Eduard w’imyaka 44 usimbuye Anastase Murekezi w’imyaka 65 wagizwe Umuvunyi Mukuru.

Abaminisitiri bigaragara ko bakiri bato bari mu biganje mubasigaye muri Guvernoma nshya n’ubwo bari bamazemo igihe, ndetse n’abakuze barimo usesenguye abarengeje imyaka 50 ni mbarwa.

Nubwo nta makuru ahagije kuri buri umwe mu bashya b’injiye y’ibijyanye n’imyaka, ikigaragarira amaso ni uko mu bashyizwe muri Guvernoma benshi bakiri mu myaka mike.

Baje biyongeremo kubari basanzwemo binjiye muri guverinoma bari munsi y’imyaka 35, twavugamo Jean Philbert Nsengimana, Kaboneka Francis, Germaine Kamayirese, Clare Akamanzi, Rwamukwaya Olivier, Dr. Ndimubanzi Patrick, Uwizeyimana Evode n’abandi bigagaragara ko bakiri bato mu myaka nkuko Perezida Kagame yabigarutseho arahiza Minisitiri w’Intebe, avuga ko Guverinoma ikeneye abafite imbaraga ubwenge n’ubushobozi. ibi kandi yanabigarutseho ubwo yarahiraga avuga ko urubyiruko rwagaragaje ubushake mu kumwamamaza rugomba kwitabwaho.

Olivier Nduhungirehe, na we ni umwe mu banyapolitiki bato utatunguranye muri Guverinoma nshya, aturuka mu Ishyaka PSD abereye Visi Perezida, rifatwa nk’irya kabiri inyuma y’Umuryango FPR-INKOTANYI. Uyu mugabo w’imyaka 39 ukunze kugaragara cyane ku mbuga nkoranyambanga ahanganye n’abatavuga rumwe na Leta, asanzwe ari Ambasaderi w’u Rwanda mu Bubirigi.

Nduhungirehe uzamutse vuba muri iyi myaka 3 muri Politiki y’u Rwanda, yatekerezwagaho muri Guvernoma nshya nk’umwe mu badiplomate bakomeye kandi na none nk’umwe ukiri muto muri PSD ryashyigikiye Paul Kagame mu matora, rigomba guhagararirwa muri Guvernoma nk’ishyaka rya 2 rifite imyanya minshi mu Nteko ishinga amategeko.

Ibisa n’ibyatunguranye..,

Ugusohoka kwa Minisitiri Kanimba Francois wari umaze igihe ari Minisitiri w’ubucuruzi n’inganda, ndetse wari umaze igihe gito yongereweho inshingano z’Umuryango w’Afurika y’uburasirazuba biri mu byatunguye benshi.

Kanimba utagarutse muri Guvernoma wari ukiri mu nkubiri yoguteza imbere ibikorerwa mu Rwanda (Made in Rwanda), asanzwe afatwa nk’umwe mu bahanga mu bukungu, dore ko yabaye Minisitiri avuye muri Banki Nkuru y’u Rwanda yayoboye hafi imyaka 10.

Ikindi gisa n’icyatunguranye ni Itandukanywa rya Minisiteri y’Ibidukikije yahawe Dr. Vincent Biruta, igatandukanywa na Ministeri y’ubutaka n’amashyamba yahawe Tumushime Francine.

Ikibazwa cyanatunguranye n’imikorere itandukanye hagati y’izi minisiteri zije zisanga ikigo cy’igihugu gishinzwe kwita ku bidukikije (REMA), Ikigo gishinzwe iby’ubutaka , ikigo cy’Igihugu gishinzwe za Mine, Gazi na Peteroli kiyobowe na Gatare Francis na we uri mu bagize Guverinoma.

Perezida Kagame ubwo yarahizaga Minisitiri w’Intebe Ngirente Eduard yabwiye abari bateraniye mu Nteko Ishinga Amategeko ko amahame y’isaranganya n’ibiteganywa n’amategeko byageragejwe kubahirizwa, n’ubwo byaba bitashimisha bose ari bigera kuri benshi. Cyane cyane Umukuru w’igihugu yaciye amarenga 30% y’imyanya y’abagore yubahirijwe ndetse ko ishobora kurenga ari byo byabaye ko mu aba_minisitiri 20 muri bo 11 ari abagore mu gihe abanyamabanga ba Leta abagore ari 2 kuri 11, ari byo bitanga 40,6 %.

Yisangize Inshuti.

Ibitekerezo

Tanga Igitekerezo