Jeannette Kagame yashyize ibuye ry’ifatizo ahazubakwa inzu zizacumbikira Incike 100 za Jenoside

Umufasha wa Perezida Paul KAGAME akaba n’umuyobozi wa Unity Club ashyira ibuye ry’ifatizo ahazubakwa amazu y’abacitse ku icumu

Umufasha wa Perezida Paul Kagame, Jeannette Kagame kuri iki cyumweru yashyize ibuye ry’ifatizo ahazubakwa amazu azatuzwamo Incike za Jenoside zisaga 100, inzu izubakwa mu murenge wa Mukura, akarere ka Huye.

Uretse aya mazu Nyakubahwa Jeannette Kagame yatangije kubaka, biteganyijwe ko ari bunafungure ku mugaragaro amazu abiri yiswe Impinganzima yubatswe na Unity Club (UC) akaba azacumbikira abagore b’Incike 16 biciwe abana babo muri Jenoside yakorewe abatutsi muri 1994.

Mu ijambo rye, Jeannette Kagame yashimiye abitabiriye igikorwa cyo kuremera ababyeyi bagizwe Incike na Jenoside yo mu 1994, ndetse anashimira umuryango AVEGA Agahozo ku mirimo myiza n’ubwitange ihora igaragaza mu kwita kuri aba babyeyi.

Jeannette Kagame yavuze ko gufasha aba babyeyi ari ukubitura ibikorwa by’indashyikirwa bakorera igihugu kandi babifatanyije n’ibikomere batewe no kubura ababo mu gihe cya Jenoside yakorewe abatutsi.

Yagize ati: “Twibuka iteka ko ababyeyi nkamwe bafashije igihugu cyacu kubona ibisubizo by’ibibazo bikomeye mubifatanyije n’ibikomere, Mwarereye u Rwanda, harageze rero ko umuryango mwasanye na wo ubitaho, ukabitura, ukabashajisha neza.”

Yakomeje agira ati “Mu rwego rwo kubaha amasaziro meza, Leta yatanze umurongo wo guhuriza hamwe aba babyeyi, iyi nyubako izabasha kwakira ababyeyi basaga ijana.”

Madamu Jeannette Kagame kandi yavuze ko nubwo hari intambwe igaragara imaze guterwa mu gufasha ababyeyi barokotse Jenoside, ngo igihugu kiracyafite umubare munini w’ababyeyi bakeneye kwitabwaho.

Igikorwa cyo kubaka aya mazu cyatewe inkunga na Banki itsura amajyambere BRD aho yagennye 100, 000, 000Frws zo kuzifashisha muri iyi mirimo yo kubaka aya mazu.

Umuryango Unity Club washinzwe 1996, uhuriza ahamwe abari abayobozi n’abafasha babo mu gihe cya kera no kuri ubu, hagamijwe guteza imbere ubumwe ndetse no guharanira amajyambere arambye y’igihugu.

Intego y’uyu muryango kuva utangira, yari ugushyiraho ihuriro rihuza abanyamuryango n’abanyarwanda muri rusange bafite inyota yo guteza imbere ibiganiro ku kurwanya imbogamizi bahura nazo, imirimo ibyara inyungu ndetse no gukorera hamwe mu kurwanya ibibazo byibasira iterambere ry’abanyarwanda.

Mu myaka 20 ishize Unity Club yagiye itera imbere binyuze mu ntego zayo aho imaze kuba intwararumuri ku banyarwanda bose iteza imbere uburinganire, ubuvugizi ku batishoboye muri rusange bibanda ku mfubyi n’abapfakazi.

Yisangize Inshuti.

Ibitekerezo

Tanga Igitekerezo