Gasinzigwa yasimbuye Bazivamo Christophe muri EALA

1

Inteko Ishinga Amategeko umutwe w’abadepite na Sena yateranye kuri uyu wa Gatatu tariki 19 Ukwakira 2016 yatoye Gasinzigwa Oda ku mwanya w’Umudepite uhagarariye u Rwanda mu Nteko Ishinga Amategeko y’Afurika y’Iburasirazuba (EALA).

Gasinzigwa ugiye kuri uyu mwanya yari amaze igihe asimbujwe muri Guverinoma y’u Rwanda ku mwanya wa Minisitiri w’uburinganire n’umuryango, akaba asimbuye Bazivamo Christophe.

Ni amatora yari yitabiriwe n’Abadepite 54 ndetse n’Abasenateri 21 bose bakaba bari 75.

Gasinzigwa yagize amajwi 71.Mu matora yari ahanganye na Kanamugire Calixte ukora mu bunyamabanga bwa FPR-Inkotanyi watowe n’abadepite bane gusa.

Bazivamo uturuka mu ishyaka rya FPR Inkotanyi aherutse gutorerwa kuba Umunyamabanga mukuru wungirije w’Umuryango wa Afurika y’Iburasirazuba(EALA), aho yagiye kungiriza Umurundi Ambasaderi Liberat Mfumukeko.

Gasinzigwa yavutse mu 1967, avukira muri Tanzaniya ku babyeyi b’abanyarwanda bari barahungiyeyo. Mu 1998 Gasinzigwa yatorewe kuba umwe mu bakozi bakorana n’ubunyamabanga bw’inama y’igihugu y’abagore, muri 2001 yatorowe kuba umunyamabanga w’inama y’igihugu y’abagore ushinzwe ibikorwa by’inama y’igihugu y’abagore kuva ku rwego rw’umudugudu.

Naho Muri 2004 yatorewe kuba Perezida w’inama y’igihugu y’abagore , Muri 2008 Gasinzigwa yagizwe umugenzuzi mukuru w’urwego rushinzwe iyubahirizwa ry’uburinganire hagati y’abagore n’abagabo (GMO), akaba yarahavuye muri 2013 ajya ku mwanya wa Ministri w’uburinganire n’iterambere ry’umuryango, aho yasimbuye Nyakwigendera Inyumba Aloyisia witabye Imana mu mpera za 2012.

Muri Werurwe ni bwo Perezida wa Repubulika yari yamusimbuje muri muri Minisiteri y’Uburinganire n’Iterambere ry’Umuryango Diane Gashumba nawe waje kwimurirwa muri Minisiteri y’Ubuzima.

Yisangize Inshuti.

Ibitekerezo 1

  1. Nukuri imana ibahumugisha kuba mwamugiriye ikizere mwebwe badepit naba senatel nukuri uyumubyeyi numuyobozi ndabarahiye

Tanga Igitekerezo