BUMBOGO:Abaturage bashimiwe n’abadepite basabwa gusigasira ibyo bamaze kugeraho

Uwimanimpaye Jeanne D’arc, Visi Perezida w’inteko Ishinga Amategeko, umutwe w’Abadepite

Abaturage bo mu Kagali ka Kinyaga mu Murenge wa Bumbogo ho mu karere ka Gasabo, bashimiwe uruhare bagira mu gufatanya n’abayobozi, bubaka ibikorwa remezo ndetse basabwa gukomeza gusigasira ibyagezweho.

Ni mu nama rusange yabaye kuri iki cyumweru tariki 25 Nzeli 2016 mu Karere ka , ubwo intumwa ziturutse mu Nteko Ishinga Amategeko umutwe w’abadepite zasuraga abaturage b’Akagali ka Kinyaga banabafasha mu bijyanye no kwikemurira ibibazo. Akaba muri gahunda abagize Inteko Ishinga amategeko barimo basura abaturage mu Ntara zitandukanye z’u Rwanda, batangiye mu kwezi kwa Kanama 2016.

Byinshi mu biganiro byatanzwe byibanze ku gushimira abaturage bo muri aka Kagali ka Kinyaga ibyo bamaze kwigezaho ndetse no kubakangurira gukomeza kugira isuku, kugira imirire myiza, gushyira abana mu ishuri ndetse no guharanira kugira umutekano usesuye .

Umuyobozi w’Akarere ka ka Gasabo, Rwamurangwa Stephen yavuze ko nk’Akarere ahagarariye bishimiye iki gikorwa cyateguwe n’Inteko Ishinga Amategeko, avuga ko ari inzira nziza iganisha ku miyoborere myiza. Yaboneyeho no gushimira by’umwihariko abaturage ku ruhare rwabo bagize rwatumye aka Karere kaza ku isonga mu mihigo ya 2015-2016.

Depite Mujawamariya Berthe yashimye byinshi bimaze kugerwaho muri aka Karere ka Gasabo by’umwihariko Umurenge wa Bumbogo birimo kuba abaturage bafatanya n’inzego z’ubuyobozi mu rwego rwo kwiyubakira ibikorwa remezo.

Mujawamariya kandi yasabye abaturage ba Bumbogo gukomeza kugira uruhare mu kugira umuryango mwiza uzira amakimbirane, guhangana n’ikibazo cy’abana bava mu mashuli, ikibazo cy’isuku nke ndetse n’ikibazo cy’imirire mibi, asaba abagore kuba abagore beza babereye u Rwanda bimakaza ubufatanye mu ngo.

Yagize ati: “ Nimube abagore babereye u Rwanda abagore b’abanyarwandakazi bubaha abagabo.., Perezida Kagame abishimirwe yahaye umugore ijambo ariko kumuha ijambo si ukumubwira ngo shira isoni usuzugure umugabo ahubwo ni ukumubwira ngo agaciro ufite niko umugabo afite. Nimwuzuzanye mu bikorwa mukora mufatanye."

Visi Perezida w’Inteko Ishinga Amategeko umutwe w’Abadepite, Uwimanimpaye Jeanne D’arc yashimiye abaturage b’Akarere ka Gasabo by’umwihariko akagali ka Kinyaga kuba batacyitwikira ijoro bubaka mu kajagari ahubwo bagafatanya n’ubuyobozi mu kwikemurira ibibazo birimo kwirindira umutekano.

Yagize ati: “ Ndabashimira muri aba mbere mu kugura imodoka zirinda umutekano, ni bumwe mu buryo bukomeye mwashyizeho mu rwego rwo kwirindira umutekano. Hari ikindi kiza nabonye aho abaturage ba Kinyaga bemera ko babakorera umuhanda badasabye ingurane. Aho umuhanda wageze ubutaka bugira agaciro kandi hakagera ibikorwa remezo”

Depite Uwimanimpaye kandi yasabye abaturage gukomeza gukorera hamwe bagira umuco wo kuzigama birinda kurya ibirenze ibyo binjiza ndetse baharanira kwigira birinda guhora bashaka gufashwa n’abandi.

Muri iyi nama, abaturage bahawe umwanya wo kubaza ibibazo ndetse bahabwa ibisubizo bibanyuze. Nyuma y’iyi nama abadepite n’abayobozi batandukanye basuye Site ya Kinyaga iri kubakwamo amazu y’icyitegerezo, bishimira iterambere riri kuhaza.

Umurenge wa Bumbogo ni umwe mu Mirenge 15 igize Akarere ka Gasabo, ukaba ari umurenge uri kwihuta mu Iterambere , aho wanaje ku mwanya wa gatatu mu kwesa imihigo y’uyu mwaka ushize.

Abayobozi batandukanye ku rwego rw’akarere bari bitabiriye iyi nama

Depite Mujawamariya Berthe wibanze ku kubakangurira gukomeza kugira isuku


Abaturage bitabiriye iyi nama ku bwinshi

Nduwayezu Alfred, Umunyamabanga Nshingwabikorwa w’Umurenge wa Bumbogo wari umusangiza w’amagambo


Itorero ry’umurenge ryasusurukije abitabiriye inama


Abaturage bahawe umwanya wo kubaza ibibazo ndetse banyurwa n’ibisubizo

Inkuru ya Mugemanyi Jean Paul

Yisangize Inshuti.

Ibitekerezo

Tanga Igitekerezo