Gakenke: Hari abafite impungenge ko batazatora Perezida

Umwe mu baturage b’i Gakenke bafite impungenge ko batazatora kubera irangamuntu zabo

Mu duce dutandukanye tw’akarere ka Gakenke haragaragara abaturage biganjemo urubyiruko bavuga ko bafite impungenge ko bashobora kutazatora Perezida wa Repubulika bitewe nuko badafite amarangamuntu cyangwa bakaba bazifite ariko ziriho amakosa mu myirondoro.

Komisiyo y’igihugu y’amatora irabarura by’agateganyo abaturage basaga 6,861,232 bazatora Perezida wa Repubulika muri Kanama uyu mwaka ariko bashobora no kwiyongera cyangwa kugabanyuka.

Mu karere ka Gakenke mu mirenge ya Kivuruga na Gakenke haragaragara ibibazo kuri bamwe bishobora gutuma batitabira amatora bitewe nuko indangamuntu zabo zasohotse ziriho amakosa y’imyirondoro cyangwa ugasanga bamwe nta ndangamuntu barafata kimwe n’abazitaye kandi bagejeje igihe cyo gutora.

Bizimana Evaliste wo mu murenge wa Kivuruga, avuga ko afite ikibazo cy’uko indangamuntu ye yasohotse iriho umwirondoro utandukanye n’uwe dore ko ngo yasohotse iriho ko ari igitsina gore.

Bizimana yagize ati: “Nagize ikibazo cy’uko indangamuntu yanjye yaje ituzuye, bashyizeho ko ndi igitsina gore kandi ndi atari byo, nagiye ku murenge barambwira ngo ntibabasha kubikora ngo nzajye ku Kabindi kandi urabona ko kuva hano ukagera ku Kabindi ni ikindi kibazo.”

Umunyambabanga Nshingwabikorwa w’umurenge wa Kivuruga, Nkurunziza Jean Bosco avuga ko iki kibazo cy’abadafite indangamuntu n’abashaka kuzikosoza kigiye gukemuka vuba ku buryo yizeza ko aba bose bazatora nta kabuza.

Yagize ati: “Nta bantu benshi twifuza ko basubira ku Kabindi ,…twasabye abakora kuri serivise z’irangamimerere ko umukozi ubishinzwe yicara akabikosora mu buryo bw’ikoranabuhanga bubahuza na NIDA, indangamuntu zikabasanga hano tugahamagara abaturage bakaza bakazitwara. Turi gukemura ikibazo cy’ingendo, ntitwifuza ko abantu bakomeza kujya i Kigali cyane cyane ko bishobora no kubatera ubukene kandi hari abakozi babikora,…. ikoranabuhanga ryarabyoroheje cyane.”

Prof Kalisa Mbanda, Perezida wa Komisiyo y’igihugu y’amatora yavuze ko mu minsi ishize baganiriye n’abayobozi bashizwe irangamimerere babasaba kwihutira gukemura ibyo bibazo ariko anavuga ko mu gihe iyo ndangamuntu itabonetse kubera ko idakosotse neza bashobora kumureka agatora.

Yagize ati: “Twabiganiriyeho na bo kandi baremera kudufasha, hari imbaraga zishyirwa mu gufotora urubyiruko kugirango babone indangamuntu no kurugezaho amakarita y’itora kandi n’iyo byakomeye rwose umuntu atarabona indangamuntu ye kandi ari kumwe n’umuyobozi uzi se na nyina nabyo bishobora kwemerwa, akavuga ati rwose uyu ndamwishingiye ni umwana wa kanaka akajya gutora, ariko ibyiza ni uko agira indangamuntu.”


Musabyimana Jean Claude, Guverineri w’Intara y’Amajyaruguru

Hari abashobora kudatora kubera uburangare

Komisiyo y’amatora ivuga ko hari abahugira muri gahunda zabo za buri munsi bakibagirwa gukurikirana gahunda za Leta harimo n’amatora azaba muri uyu mwaka, iki kibazo ngo cyugarije urubyiruko rwinshi ndetse Prof Kalisa Mbanda yavuze ko kiniganje mu bize amashuri menshi bahugira mu byabo.

Uwitwa Nkurunziza w’imyaka 19 y’amavuko twasanze mu murenge wa Kivuruga mu kagari ka Sereri, yatubwiye ko atigeze ajya kureba ikarita ye y’itora ndetse avuga ko atanazi niba ari kuri lisiti y’itora.

Nkurunziza ati: “Ikarita ntayo mfite kandi ndayishaka, njyewe narayitegereje ariko ntayo nabonye nzi ko bazizana mu rugo ariko ntabyo ntabona,”

Twamubajije niba hari ubuyobozi yaregereye ngo abaze uko yabona ikarita y’itora adusubiza agira ati: “Ntabwo nari nabaza kuko nzi ko ari abayobozi babibwira abaturage, nta na kimwe nigeze nkora.”

Uyu uretse kuba adafite ikarita y’itora ntazi n’igihe amatora azabera kuko yatubwiye ko azaba mu kwa karindwi ku itariki atibuka.

Guverineri w’intara y’amajyaruguru Musabyimana Jean Claude yavuze ko intara ayoboye ifite intego yo kwitabira amatora ku kigero cya 100% kandi ntihaboneke imfabusa n’imwe.


Prof Mbanda uyobora Komisiyo y’amatora

Yisangize Inshuti.

Ibitekerezo

Tanga Igitekerezo