Depite Mukayisenga yasezeweho mu cyubahiro ashimirwa umurava wamuranze mu mirimo yakoze(Amafoto)

1

Abagize Inteko Ishinga Amategeko y’u Rwanda basezeye mu cyubahiro Nyakwigendera Depite Mukayisenga Francoise uherutse kwitaba Imana bamushimira umurava we n’ubuhanga byamuranze mu kazi yagiye akora mu nzego n’imirimo ya Leta.

Mu gitondo cyo kuri uyu wa 14 Kamena 2017 nibwo habaye umuhango wo gusezera bwa nyuma kuri Nyakwigendera Depite Mukayisenga Francoise witabye Imana mu ijoro ryo ku cyumweru tariki 11 Kamena 2017. Witabiriwe n’abagize Inteko Ishinga Amategeko imitwe yombi, abo mu muryango we, abayobozi bakuru b’igihugu.

Uyu muhango watangiriye iwe mu rugo ukomereza mu cyumba cy’Inteko Ishinga Amategeko abadepite n’abandi bayobozi batandukanye mu nzego nkuru z’igihugu bamusezeraho mu cyubahiro banamushimira umurava wamuranze mu kazi ke.

Minisitiri w’umuco na Siporo Uwacu Julienne wasomye ubutumwa bwa Perezida Paul Kagame, yagarutse ku murava waranze Mukayisenga mu mirimo yagiye ashingwa itandukanye.

Yagize ati: “Depite Mukayisenga yagiye ashingwa imirimo itandukanye kandi yose yayikoranye umurava.”

Yakomeje avuga ko Perezida Kagame n’umuryango we bihanganishije kandi bifatanyije mu kababaro n’abagize umuryango wa Nyakwigendera ndetse n’abagize Inteko Ishinga Amategeko kubw’urupfu rwa depite Mukayisenga ndetse avuga ko Leta izakomeza kuba hafi y’umuryango wasigaye.

Umunyamabanga mukuru wa FPR-Inkotanyi Ngarambe Francois yavuze ko Depite Mukayisenga yabaye umunyamuryango mwiza w’uyu muryango kandi yagiye agira uruhare mu bikorwa bitandukanye byiganjemo kurwanya ingengabitekerezo ya Jenoside.

Yagarutse ku murava no kwitanga byaranze Nyakwigendera avuga ko yahagarariye uyu muryango nk’intore. Ati: “Imirimo yose yashinzwe haba mu nzego z’ibanze no mu Nteko Ishinga Amategeko yarangwaga no kwitanga no gukorana na bagenzi be neza.”

Mu muryango wa FPR Inkotanyi, Depite Mukayisenga yagiye akora ubukanguramabanga butandukanye harimo kurwanya jenoside. Ngarambe yavuze ko FPR- Inkotanyi yihanganishije umuryango wa Mukayisenga kandi ko bazakomeza kuwuba hafi.

Depite Mukabarisa Donatile uyobora umutwe w’abadepite mu nteko ishinga amategeko na we yafashe umwanya wo kwihanganisha umuryango wa Hon Mukayisenga avuga ko babuze umukozi wakoranaga umurava. Na we yavuze ko yaranzwe no kurwanya jenoside n’ingengabitekerezo yayo maze avuga ko Abadepite bakoranaga nawe batazibagirwa ko yababereye umuntu w’ingenzi akanababanira neza.

Ati: “Depite Mukayisenga mu mirimo ye mu Nteko yaranzwe n’ubushishozi, ubwitange n’umurava agaragaza ubuhanga n’ubushobozi mu bitekerezo byiza yatangagatwese tuzi ubwitange n’umuhate ntagereranywa byaranze Mukayisenga kuko uburyo yatangaga ibitekerezo byagaragazaga ko yafashe umwanya uhagije wo gusoma no gusesengura. Yaranzwe no kwicisha bugufi, gukunda abantu, kubaha buri wese,gukunda ukuri, gukunda igihugu byagaragazwaga n’uruhare rukomeye yagiraga mu guharanira ubumwe bw’abanyarwanda.

Imirimo igihugu cyamushinze yayikoze atizigama, atanga umusanzu ukomeye mu kucyubaka. Ibyiza byose wakoreye igihugu ukiri hano ku isi biguherekeze. Abana bawe n’umugabo wawe usize tuzakomeza kubabanira neza nkuko nawe watubaniye neza.”

Imihango yo kumuherekeza yakomereje mu rusengero rwa ADEPR Kacyiru,ikaba ikomereza mu irimbi rya Rusororo.

Mu mafoto dore uko uyu muhango wagenze mu Nteko Ishinga Amategeko y’u Rwanda.

Yisangize Inshuti.

Ibitekerezo 1

Tanga Igitekerezo