Brig Gen Nkubito yihanangirije abanyamadini bahanura intambara iyo amatora yegereje

Brig Gen Eugene Nkubito (ibumoso) na Guverineri w’Intara y’Amajyaruguru Musabyimana Jean Claude

Umuyobozi w’ingabo mu Ntara y’amajyaruguru Brig Gen Eugene Nkubito arasaba abanyamadini bahanura ibihuha by’intambara mu gihe cyo kwitegura amatora kwisubiraho bagahanura amahoro aho gutera ubwoba abaturage bababuza gutora.

Ibi Brig Gen Nkubito yabivugiye mu nama yateranye kuwa 22 Gicurasi 2017, yahuje Perezida wa Komisiyo y’igihugu y’amatora mu Rwanda Prof Kalisa Mbanda n’abayobozi b’inzego zitandukanye mu ntara y’Amajyaruguru harimo n’abihaye Imana ndetse n’abanyamadini.

Iyi nama yari igamije kurebera hamwe aho imyiteguro y’amatora ya Perezida wa Repubulika igeze ndetse no gusuzumira hamwe ibibazo n’imbogamizi zishobora kuyazamo hagashakwa uko izo mbogamizi zashakirwa umuti.

Mu rwego rwo kunoza umutekano muri aya matora no mu myiteguro yayo, umuyobozi w’ingabo mu ntara y’Amajyaruguru Brig Gen Nkubito yasabye abanyamadini kwirinda ubuhanuzi buhanura intambara bukunze kugaragara mu bihe bibanziriza amatora mu Rwanda kuko buba ari ibihuha bigamije kubuza rubanda umutuzo no kwica umutekano mu matora.

Icyo gihe yagize ati: “Iyo tugiye kujya mu matora buri gihe haza ikintu cy’ibihuha, igihuha kikaza mu baturage ahantu hatandukanye kizanywe n’abantu bagamije gutera ubwoba abaturage no guhungabanya imigendekere myiza y’amatora, murabizi ko igihuha buri gihe kibuza abantu gukora, aha rero ndagirango nsabe yuko twabihagurukira.”

Yatanze urugero rw’amatora ya Referandumu aherutse kuba mu Rwanda avuga ko mu Ntara y’amajyaruguru icyo gihe hadutse igihuha cy’intambara kandi ngo cyazanywe n’abantu bitwikiriye amadini.

Yagize ati : “Ntanze nk’urugero mu gihe cy’amatora ya referandumu, mu ntara y’amajyaruguru hari ahantu hagaragaye igihuha cyuko hagiye kubaho intambara, kandi bikavugwa n’abantu bitwikiriye amadini, abihaye Imana bakavuga ngo bahanuriwe yuko hagiye kubaho intambara ngo abaturage bahunge cyangwa se ngo abantu bikingirane mu mazu be kujya gutora. Nagirango nsabe rero abihaye Imana bari hano n’abayobozi muri rusange twese dutegure abaturage,… ariko nibinumvikana habeho uburyo duhangana na byo”

Ibi nibyo byatumye Brig Gen Nkubito asaba abo bahanuzi kwirinda iyo myitwarire. Ati: “Ubwo rero rwose abo bahanura ibintu bibi, twasaba ko bajya bahanura, niba ari uguhanura, niba ari ukubonekerwa bareka gutera abantu ubwoba bahanura amahoro.”


Amadini mu karere ka Rulindo ahagaze ate mu matora?

Mugabo Sakindi Jean Bosco umuyobozi w’ihuriro ry’imiryango itari iya Leta, amatorero n’amadini (sosiyete civile) mu karere ka Rulindo avuga ko abayobora amatorero n’amadini bakwiye kugira uruhare muri gahunda za Leta harimo n’amatora.
Avuga ko mu Rwanda sosiyete sivile itarwanya Leta ahubwo bagira uruhare mu miyoborere myiza.

Yagize ati: “Sosiyete sivile ubundi ntabwo ishinzwe Politiki cyane, ariko mu Rwanda ho ntabwo irwanya Politiki. Mu mahanga bavuga ko ari imiryango ihora ihanganye na Leta. Amatorero n’amadini abantu barabegera cyane kuko babagirira icyizere mu matora rero nyine.”

Yakomeje agira ati “ Amadini ayobya abaturage ababuza gufata ibyangombwa nk’ikarita y’itora nayo ajya abaho, hari n’abavuga ngo amatora ntibayemera. Abo nigeze kubabaza nti ko uvuga ko utemera ibirango bya Leta kuki wakira inoti kandi hariho ibyo birango? Iyo bakwambuye kuko usanga ubuyobozi utagize uruhare mu gutora ukajya kuburegera?”


Abanyamadini bari bitabiriye inama

Uyu musaza w’imvi z’uruyenzi avuga ko amadini yo mu karere ka Rulindo yitabira ibikorwa bya Leta kuko aba no mu ihuriro ry’abafatanyabikorwa mu iterambere ry’akarere.

Avuga ko batagomba kwinjira mu mikorere ya Politiki ariko ko nabo bafite uruhare mu kubaka igihugu.

Ati: “.… Padiri ni we uyobora ihuriro ry’abafatanyabikorwa mu iterambere ry’akarere amadini y’inaha yifuza ubuyobozi bwiza kuko bazi ko ubuyobozi butangwa n’Imana, inaha muri Rulindo nta dini ribangamiye amatora. Uruhare dufite ni ukubwira abaturage tuti muzatore uwo mushaka, muzatore nta gahato, muzashishoze ku giti cyanyu ubushake bwanyu ari bwo bubayobora mu matora gutora ni uburenganzi,kubwiza rero utarabujijwe n’itegeko ni ukwihemukira.”

Guverineriw’intara y’amajyaruguru, Musabyimana Jean Claude yasabye inzego zose bireba kunoza imyiteguro yose kugirango iyi ntara izabashe kwesa umuhigo wo kwitabira amatora ku kigero cya 100% nkuko babyiyemeje.

Muri iyi ntara hazatora abantu basaga Miliyoni n’ibihumbi 51. Guverineri yahize ko bazatora bose ntihanabonekemo imfabusa n’imwe

Yisangize Inshuti.

Ibitekerezo

Tanga Igitekerezo