Bishoboka bite ko ba gitifu basaga 15 begura mu cyumweru kimwe ku mpamvu zabo bwite?

9

Abayobozi b’Imirenge basaga icumi bamaze kwegura ku mirimo yabo

Mu cyumweru kimwe, abanyamabanga Nshingwabikorwa b’Imirenge isaga 15 bamaze kwegura ku mirimo yabo, bavuga ko babikoze ku mpamvu zabo bwite.

Ku ikubitiro, heguye abanyamabanga Nshingwabikorwa b’imirenge ibiri mu Karere ka Gisagara mu mirenge ya Gikonko na Muganza.

Ibi ntibyarekeye aho kuko bidateye kabiri mu karere ka Musanze heguye ab’imirenge ya Musanze na Shingiro, abandi babiri muri Kicukiro mu mirenge ya Niboye na Gahanga na bo bakurikiraho, bane muri Nyarugenge mu mirenge ya Nyamirambo, Rwezamenyo, Mageragere na Kanyinya, na batatu mu Karere ka Nyagatare mu mirenge ya Rwimiyaga, Musheri na Gatunda.

Muri Ruhango naho biravugwa ko gitifu w’Umurenge wa Ntongwe na Ruhango beguye, gusa ngo baracyari muri konji.

Mu mpera z’icyumweru dusoza, mu Karere ka Gasabo abayobozi b’Imirenge ya Rusororo, Kacyiru, Nduba na Rutunga nabo bakuyemo akabo karenge ku mpamvu zitwa izabo bwite.

Ni ukwegura kutari gusanzweho mu buryo nk’ubwo ku banyamabanga Nshingwabikorwa b’Imirenge ari na byo bituma abantu bavuga ko bisa na ho ari igikuba cyacitse cyangwa se izindi mpamvu zikomeye zaba zatumye begura.

MAKURUKI yagerageje kuvugana na Ladislas Ngendahimana, Umuvugizi wa Minisiteri y’Ubutegetsi bw’igihugu kugirango abe yadutangariza niba hari impamvu yihariye y’iri yegura ariko ntibyakunda.

Hari amakuru agera kuri MAKURUKI avuga ko nko mu Karere ka Gisagara abo bayobozi begujwe aho kwegura ku bushake bwabo.

Nyamara nubwo bishimangirwa ko abeguye beguye ku mpamvu zabo bwite, ubwo yari mu kiganiro n’abanyamakuru muri Mutarama 2015, Perezida Paul Kagame yavuze ko nta muyobozi wegura ku mpamvu ze bwite, ngo ahubwo hari ibyo aba yanananiwe gusobanura.

Icyo gihe hari hashize iminsi hegura abayobozi b’Ubuturere dutandukanye mu gihugu.

Yagize ati: “Abo bose rero bavuga ngo beguye bisa nk’aho ari ku giti cyabo cyangwa nibo bahisemo kwegura, ntabwo ariko biba byagenze. Begura kubera ko bafite ibibazo badashobora gusubiza. Iyo ufashe uburyo bukwiye kugeza abantu kuri iyo mihigo ukabukoresha nabi cyangwa ukabukoresha ku nyungu zawe ntubukoreshe ku nyungu z’abaturage mu kugera ku mihigo, ikibazo kiravuka.”

Ni iki cyaba gituma ba gitifu begura umusubizo?

Kuva uyu mwaka watangira, inkuru zakomeje gucicikana z’abayobozi b’inzego z’ibanze bagiye batabwa muri yombi bazira amanyanga n’uburiganya muri gahunda zigamije guteza imbere abaturage nka Girinka na VUP.

Nubwo abenshi bagiye bahagarikwa, bafungwa cyangwa beguzwa ari abafite aho bahuriye n’izo gahunda mu buryo bwa hafi nk’abayobozi b’utugari, abaveterineri n’abandi, uko biri kose harimo n’uburangare cyangwa n’ubufatanye bw’abayobozi babakuriye nk’ab’Imirenge kuko akenshi byanatahurwaga igihe abayobozi bakuru nka Minisitiri bisuriye abaturage cyangwa hakozwe igenzura.

Ikindi abayobozi b’Imirenge bari barahawe imodoka zibafasha mu kazi guhera muri 2011, bazihawe ku nguzanyo. Zari imodoka zihenze bagombaga kugenda bishyura gahoro gahoro mu myaka ine cyangwa itanu.

Haherutse gutangazwa ko bagiye guhabwa izindi (ababishaka cyangwa abatazifite) nyuma y’imyaka itanu ubwo bazaba bamaze kwishyura izo bari barahawe.

Birashoboka ko hari abayobozi b’Imirenge wenda kubw’amakosa adakomeye cyane bagiye bihanganirwa, ntibirukanwe kugirango babashe kurangiza kwishyura imodoka bahawe, nyuma yo kurangiza kuzishyura bikaba ngombwa ko birukanwa kubwa ya makosa yirengagijwe ubwo bari bagifite umwenda.

Yisangize Inshuti.

Ibitekerezo 9

  1. Ubse uwa. JaabanA muri GaSabo asigaye akora iki?Kwirirwa asenya amakoperative yo muri Jaabana nagende afite amacakubiri Leta nitabare!

  2. Ubse uwa. JaabanA muri GaSabo asigaye akora iki?Kwirirwa asenya amakoperative yo muri Jaabana nagende afite amacakubiri Leta nitabare!

  3. Andika Igitekerezo Hano.gitif wumurenge wa gisenyi,MUGISHA we ategereje iki kwegura.ko ntawa murusha gukora nabi na ruswa ya mumunze.

  4. harebwe impamvu ituma begura hashobora kuba Ari iki bazo kubwabo cg kubo bakorana cg se aba boss babo iperereza rikorwe

  5. Ko mutavuga ba gitifu no muri Nyaruguru,uwiyitaga umwami Nyaminani Louis, na Munyankindi Clet, bo mu murenge ya Nyabimata na Cyahinda begujwe mu cyumweru gitaha

Tanga Igitekerezo