Ange Kagame na Ivan Kagame bahamagariye amahanga kwigira ku Rwanda

1

Imfura ya Perezida Kagame Ivan Kagame n’ubuheta bwe Ange Kagame baravuga ko icyo amahanga akwiye kwigira ku Rwanda ari uburyo rwateye intambwe igaragara mu gushyigikira Uburenganzira bw’umugore ndetse ko mu gihe kiri imbere umunyarwandakazi azaba ari umuntu ukomeye mu bice byose.

Ibi Ivan Kagame na Ange Kagame babitangarije ikinyamakuru Global Citizen cyandikirwa mu mujyi wa New York ku kiganiro kibanze ku burenganzira bw’abagore ku bukangurambaga bise “The Level the Law campaign”

Ivan Kagame yavuze ko amahanga yose akwiye kwigira ku Rwanda uburyo rwagerageje kunganisha abanyarwanda bose, abagore bakagira ijambo ndetse bakaba bari mu nzego zitandukanye.

Yagize ati: “uburinganire bw’ibitsina byombi bwakunze kuba inzitizi kugeza n’aho abayobozi ba Leta y’u Rwanda bahinduye amategeko bagarura abakobwa n’abagore mu byiciro byose by’ubuzima. Umuryango nyarwanda wose ugira uburumbuke mu gihe abakobwa n’abagore babasha kwiga, igihe hari uburinganire mu nzego z’abikorera bivuze ko hari amahirwe y’akazi ku bagore n’abagabo. Ibindi bihugu bikwiye kwigira ku Rwanda.”

Ibi byashimangiwe na mushiki we Ange Kagame aho yagaragaje ko ibigo byo gufasha abagore bakorewe ihohoterwa bya Isange One Stop Centre birimo gutanga umusaruro ugaragara kandi birimo no gutera imbere.

Yagize ati: “nyuma y’aho umubyeyi wange atangije Isange One Stop Centers mu guhangana n’ihohoterwa rishingiye ku gitsina mu Rwanda, ibyo bigo biri gukura cyane. Ubufasha bujyanye n’ubujyanama, guhabwa imiti ku bahohotewe ako kanya, bifite inyungu igaragara ku bagore baba bihebye.”

Ange Kagame yagaragaje ko mu myaka itanu iri imbere abona abagore n’abakobwa bazakomeza kubona uburezi buhagije, guhabwa imbaraga ndetse no gukomeza kugira ijambo mu myanya ifata ibyemezo.

U Rwanda rukomeje gushimwa n’amahanga kuba rwarahaye umugore ijambo.
Kugeza ubu u Rwanda ruyoboye ibindi bihugu ku Isi mu gushyigikira gahunda yo guteza imbere uburinganire yiswe ’He For She’ akaba ari na rwo rufite abagore benshi mu Nteko Ishinga Amategeko ku Isi.

Mu nzego zifatirwamo ibyemezo, Leta y’u Rwanda yemeje ko hagomba kugaragaramo byibuze 30% by’igitsina gore, ubu mu Nteko Ishinga amategeko abagore barimo ku kigero cya 64%, abaminisitiri ni 40%, abakora mu bucamanza ni 50%, abayobora intara ni 50%, naho abayobora mu turere bakaba ari 43,6%.

Yisangize Inshuti.

Ibitekerezo 1

Tanga Igitekerezo