U Buyapani bwijeje u Rwanda ubufatanye mu guhangana n’Ibiza no kwita ku mpunzi

Ambasaderi Takayuiki (iburyo) na Ministiri Mukantabana

Ambasaderi w’u Buyapani mu Rwanda Takayuiki Miyashita yizejeje u Rwanda ubufasha bw’igihugu cye mu bijyanye no gukemura ikibazo cy’impunzi ndetse no kurwanya ibiza.

Kuri uyu wa mbere tariki 25 Nyakanga 2016 ni bwo Ministiri ushinzwe ibiza no gucyura impunzi Mukantabana Selaphine yakiriye mu biro bye Ambasaderi w’u Buyapani mu Rwanda Takayuiki Miyashita.

Ubwo yakiraga ambasaderi w’u Buyapani mu Rwanda Ministiri Mukantabana yashimye umusanzu u Buyapani butanga muri gahunda zitandukanye zirengera ubuzima bwa muntu mu Rwanda harimo no guhangana n’ikibazo cy’ibiza n’impunzi.

Yagize ati: “ Mfashe uyu mwanya wo gushima ubufatanye twagiranye n’abababanjirije ndetse no guha agaciro ubufasha igihugu cy’u Buyapani cyagiye kiduha mubijyanye no gushyira mu bikorwa imishinga itandukanye yagiye itanga inyungu zifatika.”

Uhereye mu mwaka wa 2010 kugera 2013, guverinoma y’u Buyapani yateraga inkunga umushinga ushinzwe kuzamura ubukungu rusange bw’abanyarwanda batahutse ndetse n’abatagira kivurira( Enhancing Socio-economic Reintegration of Rwandan returnees and other vulnerable groups) aho washyizwe mu bikorwa na MIDIMAR ku bufatanye na IOM, abanyarwanda batahutse barenga 13000 bakaba barungukiye muri uyu mushinga mu bijyanye no guhabwa ubumenyi ngiro, aho baba ndetse n’ibibafasha kubaho.

Vuba aha ku bufatanye n’igihugu cy’u Buyapani MIDIMAR yashyize mu bikorwa undi mushinga wiswe mu ndimi z’amahanga ( Prepatation for Resilent Recover) hagamijwe gushyiraho icyaro gifite ubushobozi bwo guhangana n’ibiza.

Minisitiri Mukantabana yakomeje avuga ko iyi mishinga yose yagize akamaro kanini bityo bakaba baha agaciro ibyakozwe. Ati: " Ingaruka nziza z’imishinga yavuzwe haruguru ni ngombwa ko tuzivuga."

Ambasaderi Takayuiki yijeje ubufatanye n’imbaraga nyinshi mu gufasha u Rwanda mu guhangana no gukemura ikibazo cy’impunzi ndetse n’ibiza.

Yagize ati: " Twagiye dutanga ubufasha mu gukemura ikibazo cy’impunzi binyuze muri UNHCR cyane cyane twitaye ku mpunzi zo mu Burundi ziri mu Rwanda, ku rundi ruhande igihugu cyacu gifite ubunararibonye mu guhangana n’ibiza ari byo bizadufasha gufasha u Rwanda guhangana n’ibiza, ndatekereza ko mu gihe kizaza tuzagira byinshi byo gukorana hamwe n’iyi Minisiteri."

Takayuiki Miyashita yashyikirije umukuru w’igihugu cy’u Rwanda impapuro zimwemerera guhagararira igihugu cye hano mu Rwanda vuba aha mu kwezi kwa Nyakanga 2016.

Urugendo rwe muri Minisiteri y’ibiza no gucyura impunzi ni rumwe mu biri ku murongo w’ibyo agomba gukora harimo guhura n’abayobozi b’ibigo bitandukanye mu Rwanda kugira ngo hakomeze ubutwererane hagati y’u Rwanda n’igihugu cy’u Buyapani.

Src/MIDIMAR

Yisangize Inshuti.

Ibitekerezo

Tanga Igitekerezo