Amasezerano ya Yamoussoukro akenewe gushyirwa mu bikorwa: Perezida Kagame

Umukuru w’igihugu cy’u Rwanda Paul Kagame arakangurira abanyafurika gushyira ingufu nyinyi mu bwikorezi bw’abantu n’ibintu mu kirere ku bukiri hasi kuri uyu mugabane amasezerano ya Yamoussoukro agashyirwa mu bikorwa .

Ibi Perezida Kagame yabivugiye mu nama yiga kubwikorezi bw’indege ku mugabane wa Afurika iteraniye i Kigali kuri uyu wa gatatau tariki ya 22/2/2017.

Iyi nama yitabiriwe n’abantu 550 bavuye mu bihugu 58, ibigo by’ indege 120 n’ibindi 56 bimurika ibikorwa. Iyi nama irigira hamwe icyateza imbere gutwara abantu n’ibintu mu nzira y’ikirere muri Afurika.

Perezida w’u Rwanda Paul Kagame yabwiye abitabiriye iyi nama ko uyu ari umwanya mwiza Afurika n’u Rwanda byumwihariko babonye wo kubuteza imbere kandi abanayafurika batazongera kugira umuzigo wo gusura ibihugu byawo.

Perezida Kagame ati:” Uyu ni umwanya mwiza ku gihugu n’Umugabane wacu kuko tubona tugira ubushobozi tugana ku iterambere twifuza.Twizeye ko vuba, umunyafurika wifuza gukoresha indege asura ikindi gihugu cya Afurika, bizajya bimworohera aho kuba umuzigo.”

Perezida Kagame avuga ko amasezerano yasinywe I Yamoussoukro akwiye gushyirwa mu bikorwa kuko uru rwego rukiri hasi kuri uyu mugabane.

Ati:” Amasezerano ya Yamoussoukro akenewe gushyirwa mu bikorwa kuko ubwikorezi bw’abantu n’ibintu mu ndege rutaratera imbere… Ubwikorezi bw’abantu n’ibintu mu ndege hagati y’ibihugu bya Afurika buri hasi cyane ugereranije no kujya ku yindi migabane.”

Perezida Kagame yavuze ko u Rwanda rwateye intambwe muri uru rwego rufungurira ikirere cyarwo ibigo bitwara indege muri Afurika.

Perezida Kagame yavuze ko gukuraho inzitizi ari ikintu cy’ingenzi ariko kandi ngo ntibihagije kuko hakenewe no kubaka n’ubushobozi bw’abakora muri ubu bwikorezi bw’indege.

Perezida avuga ko urubyiruko rw’Abanyafurika ndetse n’Abanyarwanda bakwiye kwiga cyane ibijyanye n’indege. Ati:” turashaka kubona urubyiruko rwinshi rw’abanyarwanda n’urwabanyafurika biga ibijyanye no gutwara abantu n’ibintu mu kirere nko gutwara indege(pilots), abenjeniyeri( engeneers),….”

Perezida Kagame ariko yavuze ko hakwiye kwishimirwa ko muri iyi minsi hagaragara ubushake bwo kuzamura uru rwego rw’ubwikorezi bw’indege muri Afurika.

Yisangize Inshuti.

Ibitekerezo

Tanga Igitekerezo