Abagiraneza n’abaterankunga baratumugaje-Amb Joe Habineza

4

Uwahoze ari Minisitiri w’Umuco na Siporo, Joseph Habineza aravuga ko Abanyarwanda bamugajwe n’abitwa abaterankunga cyangwa abagiraneza bituma benshi batihangira imirimo ahubwo bategereje indonke ku mugiraneza wabafasha.

Ibi Amb Joe yabivuze nyuma yuko hashize iminsi havugwa ko amaze kugeza ku isoko ryo mu Rwanda amakaroni yahaye izina rya ‘pasta Joe’, akorwa n’uruganda rwo mu Misiri rwitwa ‘Antoniou’ zikaba zaratangiye gucururizwa mu Rwanda.

Kuri iki cyumweru mu kiganiro na City Radio nibwo yatangaje ko guhanga umurimo ari ukwiyemeza, ukemera kwirengera ingaruka zose aho yatanze urugero rwa Nigeria ituwe n’abaturage basaga miliyoni 80 ariko umwe mu bakire ba mbere bahari akaba acuruza ibipesu. Aha yashakaga kugaragaza ko bigusaba gutekereza cyane icyo abantu bakeneye kurusha ibindi.

Yavuze ko mu Rwanda usanga akenshi abantu bagera 100 baba bacuruza ibintu bimwe(Butiki) aho usanga umwe yigana undi nta gashya karimo, kandi mu bucuruzi utareba umuntu ngo uvuge ngo kuko byaciyemo nanjye byacamo.

Gusa yemeza ko ibyinshi bituruka ku bagiraneza n’abaterankunga bagiye bamenyereza abanyarwanda n’Abanyafurika aho avuga ko bamugaye.

Yagize ati “Bino bintu twita ngo ni abagiraneza,byaratumugaje abaterankunga baratumugaje, guhora urekereje ngo ntegereje ko umuntu ampa. Aho kugirango utegereze ko umuntu aguha wagurishije. Nigeze kuvuga ngo reba nka hano ushobora kujya muri iyi midugudu isigaye iriho abantu ukababwira ku rugo ku rundi ngo aho kujya mu isoko nzajya mbibazanira. Ugakodesha igare watangira wunguka ijana ukagenda wunguka buhoro buhoro.”

Habineza avuga ko iyo utangiye ubucuruzi ugenda wunguka buhoro buhoro ariko hakiri ikibazo cy’uko abantu bashaka gukira vuba cyane.

Yavuze ko ugiye nko mu midugudu iri kugenda yubakwa ukababwira ko uzajya ubibagereza mu rugo bitiriwe bajya ku isoko byatangira bikugora ariko ukazagenda wunguka menshi.Gusa avuga ko uko ugenda ukora ariko ugenda wunguka buhoro buhoro ariko hari ikibazo cyuko urubyiruko rushaka gukira vuba.

Ambasaderi Joseph Habineza yasimbujwe muri Minisiteri y’Umuco na Siporo muri Gashyantare 2015. Yasimbuwe na Julienne Uwacu wari usanzwe ari umudepite mu Inteko Ishinga Amategeko y’u Rwanda.

Habineza akaba yarakoze indi mirimo itandukanye irimo kuba kuva mu 1994-2000 yarakoze imirimo itandukanye muri Heineken.

Muri Nzeri 2004-Gashyantare 2011 yabaye Minisitiri wa Siporo n’Umuco, mu 2011- 2014 agirwa Ambasaderi w’u Rwanda muri Nigeria.

@Eric Birori

Yisangize Inshuti.

Ibitekerezo 4

Tanga Igitekerezo