Abadepite batoye umushinga w’itegeko rishyiraho Urwego rw’ Iperereza (RIB)

1

Abadepite mu Inteko Ishinga Amategeko y’u Rwanda batoye Umushinga w’itegeko rishyiraho Urwego rw’Igihugu rushizwe Iperereza (RIB) rikagena inshingano, ububasha, imiterere n’imikorere yarwo.

Uyu mushinga ukaba watowe n’abadepite bagera kuri 44 muri 49 bari bitabiriye inteko rusange.

Ni nyuma yuko Inama y’Abaminisitiri yateranye ku wa Gatatu tariki 10 Kanama yemeje ko Ishami ry’Ubugenzacyaha muri Polisi y’u Rwanda (CID) rihindurirwa izina rikanashyirwa muri Minisiteri y’ubutabera (Minijust), iryari ishuri Rikuru rya Polisi naryo rigahindura izina n’imikorere.

Hakaba haremejwe ishyirwaho ry’Urwego rw’Igihugu rw’Iperereza (Rwanda Investigation Bureau, RIB) naho ishuri ryitwaga Rwanda National Police Academy rihinduka ishuri ry’iyubahirizwa ry’amategeko, Rwanda Law Enforcement Academy.

Umunyamabanga wa Leta muri Minisiteri y’Ubutabera, Me Evode Uwizeyimana, akaba yasobanuriye abadepite ko uru rwego ruzajya rukorana bisanzwe n’izindi nzego zishinzwe iperereza mu gisirikare nkuko zakoranaga na CID.Aha yatanze urugero k’Urwego rw’Igihugu Rushinzwe Iperereza n’Umutekano (NISS).

Yagize ati “Inzego zisanzwe z’iperereza zari zisanzwe zikorana ndetse nubu numva ko nta kintu na kimwe cyazibuza gukorana.”

Yavuze kandi ko uru rwego ruzajya rukorwamo n’abanyamategeko babifitiye ububasha aho yatanze urugero nk’abize muri ‘Criminology’ na “Penology “ aho kuba abapolisi basanzwe. Uru rwego kandi rukazaba rufite inama y’ubutegetsi igizwe n’abantu batanu.

Me Evode yavuze kandi ko uru rwego ruzatuma ubunyamwuga bwigaragaza mu bijyanye n’iperereza kuko hari ibyaha byinshi bigenda biza bisaba ubundi buhanga buhanitse aho yatanze ingero nk’icyaha cy’iterabwoba, ibyaha by’ikoranabuhanga, ibyaha byambukiranya imipaka n’ibindi bisaba ubumenyi bushya.

Kimwe n’Urwego rw’Igihugu Rushinzwe Imfungwa n’Abagororwa, RCS, izi nzego zizaba ziri mu maboko ya Minisiteri y’Ubutabera kuko Minisiteri y’Umutekano mu gihugu yazicungaga yakuweho.

@Eric Birori

Yisangize Inshuti.

Ibitekerezo 1

Tanga Igitekerezo