AU yongeye gufungurira amarembo abakandida bifuza gusimbura Dr. Dlamini Zuma

Dr Nkosazana Dlamini Zuma ukiyoboye AU
Komisiyo y’umuryango w’ubumwe bwa Afurika (AU) yatangaje ko yongeye gutangira kwakira abakandida bifuza guhatanira kuyobora umuryango wa AU hakazatorwa uzasimbura Dr. Nkosazana Dlamini Zuma kuri ubu ukiyobora uyu muryango.

Mu itangazo uyu muryango washyize ahagaragara kuri uyu wa kabiri tariki 10 Kanama 2016 ubuyobozi bw’umuryango w’ubumwe bwa Afurika bwatangaje ko bwongeye gufungurira amarembo abakandida bifuza kwiyamamariza kuyobora uyu muryango.

Ku myanya ikeneye abakandida harimo umwanya w’umuyobozi w’uyu muryango, umuyobozi wungirije uw’uyu muryango ndetse n’abakomiseri 8 ba AU.

Ubuyobozi bw’uyu muryango kandi bwasabye ibihugu byose bigize AU gushyiraho igihe ntarengwa cyo gutanga amazina y’abiyamamariza iyi myanya uko ari 10.

Hagendewe ku mabwiriza agenga ihuriro ry’uyu muryango, inama ya nyobozi, amahame y’uyu muryango ndetse n’uburyo bwo gutora abanyamuryango b’uyu muryango, awiyamamariza uyu mwanya w’umuyobozi wa AU, umwungirije kimwe n’abakomiseri basabwa kuzengurutsa amazina y’aba ba kandida mu bihugu byose bigize uyu muryango nibura mu gihe cy’amezi atatu mbere y’uko amatora aba.

Aya matora ateganyijwe kuba mu gihe inama y’abakuru b’ibihugu na za guverinoma izaba iterana ku nshuro yayo ya 28, akazaba ku matariki ya 30 na 31 Mutarama 2017 ku kicaro cy’uyu muryango Addis Ababa muri Etiyopiya.

Mugihe u Rwanda rwakiraga inama y’abakuru b’ibihugu naza guverinoma ku nshuro ya 27 muri Nyakanga 2016 byari biteganyijwe ko ari bwo hagombaga kuboneka ugomba kuyobora uyu muryango gusa siko byaje kugenda kuko amatora yasubiswe nyuma y’uko mu bakandida 3 bari biyamamarije kuyobora AU habuzemo n’umwe ugira bibiri bya gatatu by’amajwi amutora nyuma y’inshuro zigera kuri 7 batora.

Kuri ubu kongera gufungurira abashaka kwiyamamariza kuyobora uyu muryango wa AU bikaba byemerera abari biyamamaje kimwe n’abashya bifuza guhatanira iyi myanya 10 gutanga kandidatire zabo.

Ibihugu bifite abakandida ku mwanya w’ubukomiseri byasabwe gutanga amazina yabo ari mu ibahasha ifunze ku biro by’Umujyanama mu by’amategeko wa AU bitarenze ku ya 19 Kanama, naho uturere tugatanga abakandida batwo bitarenze ku ya 16 Nzeli.

Iri tangazo rivuga kandi ko amazina y’abiyamamariza umwanya w’umuyobozi w’uyu muryango n’umwungirije azatangwa kugeza ku ya 30 Nzeli 2016.

Biteganyijwe ko ku ya 7 Ukwakira, aribwo abagize akanama k’abaminisitiri hamwe n’ikipe ishinzwe kugenzura bazahura bagakora urutonde ndakuka rw’abakandida hanyuma bakanatangira kuzengurutswa mu bihugu bigize uyu muryango ya 24 Ukwakira 2016.

Yisangize Inshuti.

Ibitekerezo

Tanga Igitekerezo