Zimbabwe: Igisirikare kigiye kwitambika ubutegetsi bwa Robert Mugabe

Igisirikare cya Zimbabwe kigiye kwivanga mu miyoborere y’ishyaka riri ku butegetsi mu gihugu cya Zimbabwe, Zanu PF, nyuma yo kuba Perezida Mugabe akomeje kwirukana ndetse no gutoteza abagize uruhari mu guharanira ukwishyira ukizana kw’abaturage ba Zimbabwe.

Umugaba w’ingabo za Zimbabwe, Gen.Constantine Chiwenga, yabwiye itangazamakuru ko batazakomeza kurebera ibibi biri gukorwa n’ishyaka riri ku butegetsi rya ZANU PF.

Gen.Chiwenga asanga igihugu gitangiye guta umurongo, ariyo mpamvu igisirikare kigiye kwitambika imikorere ya Guverinoma y’iki gihugu mu rwego rwo kwirinda ko gishobora kujya ahabi kurushaho.

Umugaba w’ingabo za Zimbabwe, Gen.Constantine Chiwenga yagize ati, “Biteye isoni n’agahinda kubona hari abanyapolitiki bakomeje gukorana n’umwanzi wacu bakirengagiza imbaraga twakoresheje duharanira ukwishyira ukizana kw’abanyagihugu none barashaka ko igihugu gisubira mu maboko y’umwanzi, gusa natwe nk’igisirikare ntituzaryama tugiye kwitambika abo bose”

Nkuko BBC dukesha iyi nkuru ikomeza ibitangaza, igisirikari kigiye kwitambika gahunda z’ishyaka riri ku butegetsi nyuma yo kwirukana uwari Vice-Perezida w’iki gihugu, Emmerson Mnangagwa ku mpamvu igisirikare gifata nkizitumvikana.

Igisirikari cya Zimbabwe gitunga agatoki agatsiko k’abayobozi gahagarariwe na Grace Mugabe afatanije na Prof. Jonathan Moyo ndetse n’abandi biyise Generation 40 (G40).

JPEG - 42.3 kb
Kwirukana Vice-Perezida,Emmerson Mnangagwa byongereye amahirwe yo kuba Grace Mugabe yazasimbura umugabo we ku mwanya wa Perezida w’iki gihugu

Kwirukana Vice Perezida, Emmerson Mnangagwa byongerera amahirwe umugore wa Perezida, Grace Mugabe, kuba yazasimbura umugabo we ku mwanya wa Perezida wa Zimbabwe, dore ko Robert Mugabe amaze kugera mu za bukuru dore ko afite imyaka 93.

Yisangize Inshuti.

Ibitekerezo

Tanga Igitekerezo