Zimbabwe:Abakozi ba Leta 2 5000 bagiye kubura akazi

Guverinoma ya Zimbabwe yatangaje ko ishobora gusezerera abakozi bagera ku 25000, mu rwego rwo kugabanya amafaranga agenda ku mishahara y’abakozi.

Ibi bigiye gukorwa mu gihe igihugu kiri mu bihe bikomeye by’ubukungu no guta gaciro kw’ifaranga.

Ubwo yari imbere y’Inteko Ishinga Amategeko kuri uyu wa Kane, Minisitiri w’Imari Patrick Chinamasa yavuze ko leta isohora 97 % by’amafaranga yinjiza yose akagenda ku mishahara.

Avuga ko ayo mafaranga bashaka kuyagabanya nibura umwaka utaha akagera kuri 75 %.
Umwaka ushize Chimanasa nabwo yatanze icyo cyifuzo ariko cyamaganwa na Guverinoma.

Mu mezi ashize Leta yagiye ikererwa kwishyura imishahara y’abakozi cyane cyane abarimu, abasirikare ndetse n’abaganga.

Uko gukererwa kwishyura kwatumye haduka imyigaragambyo idasanzwe muri Nyakana uyu mwaka.

BBC itangaza ko nibura mu myaka icumi ishize, sosiyete z’ubucuruzi zigera ku bihumbi icumi zafunze imiryango muri Zimbabwe.

Yisangize Inshuti.

Ibitekerezo

Tanga Igitekerezo