Uwahoze ayobora Brazil yakatiwe gufungwa imyaka icyenda

Luiz Inácio Lula da Silva, wahoze ari Perezida wa Brazil yakatiwe gufungwa imyaka icyenda n’amezi atandatu nyuma yo guhamywa ibyaha bya ruswa.

Uyu mugabo wari ukunzwe mu gihugu cye ntabwo ahita afungwa mu gihe hagitegerejwe ubujurire bwe.

Bamwe mu bamushyigikiye bamaganye icyo cyemezo cy’urukiko bavuga ko kihishwe inyuma na politiki.

Lula yayoboye Brazil manda ebyiri zose atorwa n’abaturage, asimburwa na Dilma Roussef wegujwe umwaka ushize .

Lula ashinjwa gusinya ku nyemezabwishyu z’amamiliyari y’amadolari ku bantu bakomeye barimo n’abanyapolitiki, akabishyura arenze ayo bagombaga.

Uyu mugabo urukiko rukuru nirwemeza ko afungwa azaba abuze amahirwe yo kongera kwiyamamaza mu matora ateganyijwe umwaka utaha, nubwo yari mu bahabwa amahirwe.

Ikinyamakuru The Guardian cyatangaje ko nta munyapolitiki wundi ufite igikundiro mu baturage nka Lula muri Brazil.

Lula yabanje gutsindwa inshuro eshatu mu matora mbere yo gutsinda inshuro ebyiri zikurikiranya uhereye muri 2002.Ni umwe mu bashinze ishyaka ry’abakozi mu mwaka wa 1980.

Yisangize Inshuti.

Ibitekerezo

Tanga Igitekerezo