Uwahoze ari Perezida wa Chad yakatiwe gufungwa ubuzima bwe bwose

1

Hissene Habre yakatiwe burundu nyuma yo guhamwa n’ibyaha byibasiye inyoko muntu

Hissene Habre wahoze ayobora igihugu cya Chad yakatiwe igihano cyo gufungwa burundu nyuma y’uko urukiko rwo muri Senegal aho yaburaniraga rumuhamije bidasubirwaho ibyaha byibasiye inyoko muntu byabaye ku ngoma ye.

Kuri uyu wa mbere tariki 30 Gicurasi 2016 Hissene Habre nibwo yakatiwe gufungwa burundu n’urukiko rudasanzwe ruburanisha ibyaha mpuzamahanga ruri mu gihugu cya Senegal (Special African Chamber) nyuma yo guhamwa n’ibyaha byose ashinjwa.

Mu byaha Habre ashinjwa harimo kuba yaratanze itegeko ryo kwica, gusambanya no guhonyora ubuzima bw’abataravugaga rumwe na Leta yari ayoboye mu gihe cy’intambara y’ubutita.

Icyemezo cyo gujyana mu nkiko iki gikomerezwa cyagiweho impaka ndetse giharanirwa n’imiryango mpuzamahanga irengera uburenganzira bwa muntu.

Nyuma yo gukatirwa kwa Habre, Reed Brody, umushakashatsi mu muryango mpuzamahanga uharanira uburenganzira bwa muntu (Human Rights Watch) yatangaje ko kuba Hebre yarakurikiranweho ibyaha bikomeye nk’ibi nyuma y’imyaka 25 abikoze ari itsinzi ikomeye ku nzirakarengane z’abanya Chad.

Brody yongeyeho ko iki gihano ari ubutumwa bukomeye ku bantu bahonyora ubuzima bw’abo bayoboye ndetse bagakoresha imitungo yabo uko bishakiye barangiza bagahunga bakajya kubaho mu buzima bw’umunezero ,Brody avugako bigomba kugera ku iherezo.

Guverinoma ya Habre yashinjwe kwica urw’agashinyaguro abantu ibihumbi 40 (40,000) bishwe n’abapolisi bamurindaga batinywaga cyane.

Uyu mugabo yahawe iminsi 15 yo kujuririra icyemezo cy’urukiko.

Hissene Habre yayoboye Chad kuva tariki 21 Ukwakira 1982 kugeza tariki ya 1 Ukuboza 1990.

Yisangize Inshuti.

Ibitekerezo 1

Tanga Igitekerezo