Urujijo n’impaka ni byose ku nkomoko ya Perezida uyobora Gabon, Ali Bongo

Muri Gabon no mu Bufaransa hari impaka zikomeye zo kumenya neza inkomoko nyayo ya Perezida uriho muri Gabon Ali Bongo, nyuma yo gutsindira kuyobora icyo gihugu muri manda ya kabiri uyu mwaka.

Ubusanzwe Ali Bongo avuka kuri Omar Bongo wayoboye Gabon kuva mu mwaka wa 1967 kugeza muri 2009 ubwo yapfaga, na nyina Patience Marie Josephine Kama Dabany wari umuririmbyikazi.

Muri 2014 umunyamakuru akaba n’umwanditsi w’Umufaransa Pierre Pean yanditse igitabo “Nouvelles Affaires Africaines” avuga ko Ali Bongo atabyawe na Omar Bongo na Josephine, ko ahubwo ari umwana ukomoka muri Nigeria bafashe bakarera mu ntambara yo muri Nigeria izwi nka Biafran War mu myaka ya 1967-1970.

Pean avuga ko yabikuye mu buhamya bwizewe yahawe n’abo hafi y’umuryango wa Bongo, bemeza ko Josephine nta mwana n’umwe yigeze abyara kugeza muri 1988 atandukanye na Bongo.

Ikindi baheraho nuko Bongo avuga ko yavutse mu mwaka wa 1959 kandi icyo gihe Josephine yari afite imyaka 15 gusa, hakibazwa uburyo yaba yarashatse umugabo akanabyara afite iyo myaka.

Ibi bije mu gihe muri Gabon hari imvururu ku matora aherutse kuba ya Perezida. Ubusanzwe Itegeko Nshinga rya Gabon rivuga ko nta muntu wemerewe kuba Perezida atahafite inkomoko.

Kuri uyu wa Kane habonetse andi makuru anyomoza aya Pean, yatangajwe n’Ikinyamakuru kitwa Midilibre ko hagati y’umwaka wa 1965-1967 Bongo yigaga mu ishuri ry’ahitwa Ales mu Bufaransa. Icyo gihe yitwaga Alain Bongo kuko umuryango we utari wakinjiye mu idini ya Islam nkuko bamwe mu biganye na Bongo babivuze.

Omar Krim umwe mu bo biganaga icyo gihe yagize ati “Niwe mwirabura wabaga muri iryo shuri, nanjye ninjye mwarabu wabagamo gusa, kandi twaricaranaga.”

Ali Bongo ubwo yigaga mu ishuri ry’incuke mu Bufaransa

Icyo kinyamakuru gifite n’amafoto y’abana biganaga na Ali Bongo ndetse nawe ubwe ayarimo, bivuze ko niba koko yarigaga mu Bufaransa mu mwaka wa 1965, bidashoboka ko yaba yarafashwe n’umuruango wa Omar Bongo mu ntambara ya Biafra kuko yo yatangiye mu mwaka wa 1967.

N’abandi banyeshuri biganye na Bongo bavuga ko mu 1965 biganye kandi ngo yabaga mu Bufaransa.

Abajijwe ibyo yanditse kuba bihabanye n’ibyo abiganye na Bongo bavuga, Pierre Pean yavuze ko ibyo yanditse ari ukuri, ko ntacyo yavuga ku bindi byagaragajwe.

Avuga ko mu mwaka wa 1983 yanditse igitabo cyavugaga ku mubano w’u Bufaransa na Gabon, ngo muri icyo gitabo yanditse ko Josephine nta mwana yagiraga kandi ngo nta muntu n’umwe wigeze abihakana, kubw’ibyo ngo ahamya ko ibyo yavuze ari ukuri.

Icyakora uyu munyamakuru w’umwanditsi yavuze ko agiye gukurikirana akamenya neza inkomoko y’ayo makuru y’uko Bongo yize mu Bufaransa mu 1965.

Pean kandi mu gitabo cye yavuze ko Bongo yahimbye impapuro z’amashuri yize, ngo kubera ko atari umuhanga mu ishuri, byatumye agira isoni zo kwerekana amanota yagiraga.

Yisangize Inshuti.

Ibitekerezo

Tanga Igitekerezo