Umwiyahuzi yaturikirije bombe mu bitaro yica abantu basaga 60

2

Nyuma y’ituritswa ry’iki gisasu, abarokotse bari mu gahinda gakomeye

Igisasu cyaturikirijwe mu bitaro bya Pakistani cyahitanye abantu basaga 60 gikomeretsa benshi kuri uyu wa mbere mu gace kitwa Quetta gaherereye mu majyepfo y’uburengerazuba bw’intara ya Baluchistan.

Mu gitondo cyo kuri uyu wa mbere, umwiyahuzi yaturikirije bombe ku bantu biganjemo abacamanza n’abanyamakuru bari bari mu kiriyo cyo guherekeza Bilal Anwar Kasi wari umucamanza ukomeye.

Uyu mucamanza yishwe arasiwe ku muhanda mu gitero gitandukanye n’iki cyabaye mu gitondo kare kuri uyu wa mbere ubwo yerekezaga ku rukiko.

Iki gitero cyahitanye abantu basaga 60 cyabaye ubwo abantu benshi bari baje guherekeza uyu mucamanza ukomeye wishwe bari bamaze kwinjira mu cyumba cy’indembe n’inkomere ahari hari umurambo w’uyu mucamanza.

Abayobozi b’ibitaro byabereyemo iki gitero babwiye Aljazeera dukesha iyi nkuru ko hapfuye abantu basaga 60 ndetse hakaba hakomeretse abandi basaga 120.

Nta mutwe w’abarwanyi urigamba iki gitero ndetse nta n’impamvu iramenyekana yateye uyu mwiyahuzi gukora iki gikorwa cy’ubunyamaswa.

Amashusho yagaragaye ku mateleviziyo yerekanye abantu basohoka bahunga barwanira mu miryango y’ibi bitaro ari na bwo benshi bakomeretse, kuri ubu umutekano wakajijwe ahazengurutse ibi bitaro mu rwego rwo guhumuriza abahagana kugirango bashire impungenge

Ubwicanyi nk’ubu bumaze kuba akamenyero muri aka gace ka Quetta, kugeza aho basigaye bahita umujyi w’ubukozi bw’ibibi.

Quetta imaze igihe kinini yarigabijwe n’abarwanyi b’umutwe w’abaTaliban dore ko mu kwezi kwa Gicurasi haniciwe Mullah Akhtar Mansour wari umuyobozi mukuru wa Taliban wiswe n’ingabo za Leta zunze ubumwe za Amerika.


Inkomere ni nyinshi mu bitaro by’indembe n’inkomere nyuma y’iki gitero

Yisangize Inshuti.

Ibitekerezo 2

Tanga Igitekerezo