Umuyobozi w’abarinda Gen Mudacumura yatawe muri yombi

Ingabo za Congo nizo zafashe Maj Sabimana

Maj. Sabimana Iraguha uzwi nka Mugisha Vainqueur wari usanzwe ukuriye itsinda ry’abarinda Gen. Mudacumura, umuyobozi mukuru wa FDLR FOCA, yafashwe n’Ingabo za Repubulika Iharanira Demokarasi ya Congo (FARDC).

Radio Okapi itangaza ko uyu muyobozi yafashwe ku wa kane tariki 11 Kanama 2016, aho akorera muri Kiyeye – Rutshuru, ndetse akaba yareretswe itangazamakuru kuri uyu wa gatanu tarki 12 Kanama 2016 I Goma.

Maj Sabimana ngo yari umwe mu bayobozi b’abarwanyi FDLR b’intarumikwa ndetse ngo akaba yari anasanzwe ashakishwa n’ubutabera bwa Congo kubera ibyaha yakoze birimo Jenoside yakorewe Abatutsi mu Rwanda ndetse n’ibyubwicanyi yakoreye abaturage ahitwa Kamananga muri Busurungi muri Kivu y’amajyepfo.

Capt Guillaume NDjike Kaiko ushinzwe itumanaho mu bikorwa bya Sukola II (ibikorwa bya gisirikare byo kurwanya FDLR ), avuga ko Maj. Sabimana ashinjwa kuba mu mwaka wa 2013 yaba yarishe abantu 32 muri ako gace ka Bunyakiri.

Uyu muyobozi yasabye abandi barwanyi ba FDLR kuva mu mashyamba bakishyikiriza ingabo za FARDC cyangwa se iza MONUSCO.

FDLR-FOCA ni rimwe mu mashami y’umutwe wa FDLR wiganjemo abakekwaho gusiga bakoze Jenoside mu Rwanda , aho kuri ubu bihishe mu mashyamba ya Repubulika Iharanira Demokarasi ya Congo.

Mu ntangiriro z’uku kwezi ingabo za Congo zatangaje ko kuva mu mwaka ushize kugera muri Nyakanga 2016 zimaze kwica abarwanyi 140 ba FDLR ndetse ngo zikaba zaranafashe abarwanyi bagera kuri 323.

Yisangize Inshuti.

Ibitekerezo

Tanga Igitekerezo