Umusore w’imyaka 18 yahitanye abatari bake mu mujyi wa Munich

Ku mugoroba wo kuri uyu wa gatanu tariki 22 Nyakanga 2016, umusore w’imyaka 18 ufite ubwenegihugu bw’u Budage na Irani yarashe abantu mu mujyi wa Munich mu Budage abantu 9 bahasiga ubuzima abandi 21 barakomereka cyane nawe ahita yirasa.

Iki ni igitero cya gatatu kibaye mu Burayi kigahitana abasivile benshi mu minsi 8 gusa. Iki gitero cyagabwe mu mujyi wa gatatu ukomeye mu Budage aho umusore w’imyaka 18 yarasaga ku bantu bari muri resitora ya McDonald ndetse n’ihahiro byegeranye.

Abayobozi bo mu Budage bavuze ko uyu musore yarashe abantu ari wenyine n’ubwo hari andi makuru yavugaga ko hari abandi bari bafatanyije. Gusa kugeza ubu impamvu y’iki gitero ntiramenyekana bikaba bitaremezwa niba kandi cyaba ari igikorwa cy’iterabwoba.

Mu gitondo cyo kuri uyu wa Gatandatu, polisi yo mu Budage yasatse mu rugo rw’uyu mwiyahuzi ariko nta byinshi ku myirondoro ye byatangajwe.

Angel Markel, Chancelleriere w’Ubudage yahamagaje inama idasanzwe yo kwiga kuri iki gitero kije gikurikira icyabereye muri mu mujyi wa Nice mu Bufaransa .

Perezida w’u Bufaransa Francois Hollande yavuze ko iki gikorwa ari icy’iterabwoba kigamije guhungabanya u Burayi ariko ko bagomba kubihashya bafatanyije.

Inzego z’iperereza za Leta zunze ubumwe za Amerika zabwiye Reuters ko abashinzwe iperereza mu Budage bagaragaje ko iki gitero ntaho gihuriye n’umutwe wa Leta ya Kiyisilamu (IS) umaze kugaba ibitero byinshi ku isi.

Ubu nta modoka ziri kugenda mu mujyi wa Munich ndetse n’abantu basabwe kuguma mu ngo zabo kugira ngo hakorwe iperereza.

Yisangize Inshuti.

Ibitekerezo

Tanga Igitekerezo