Umurobyi yarohamye mu kiyaga ahunga abashinzwe umutekano

Umugabo w’umurobyi witwa Polojo Ivan wari utuye mu gace ka Kachanga, mu gihugu cya Uganda, yarohamye mu kiyaga arapfa ubwo yahungaga inzego zishinzwe umutekano, zamushinjaga gukora uburobyi mu buryo butemewe.

Uyu mugabo wari ufite ubwenegihugu bwa Tanzania, ngo yirutsweho n’abashinzwe umutekano babiri bakoresheje bwato, maze ngo mu kubahunga arohama mu kiyaga giherereye mu kirwa cya Ssese.

Nyuma y’uko ibi bibaye ku wa gatanu w’icyumweru twaraye dushoje, ngo kuri iki cyumweru tariki 31 Nyakanga 2016, abaturage bo muri aka gace ngo bafashwe n’uburakari maze batwika inzu y’uwitwa Geoffrey Kyalimpa (umwe mu bashinzwe umutekano birutse kuri nyakwigendera) bavuga ko ari we wateje urupfu rw’uyu murobyi.

Amakuru atangazwa na Daily Monitor avuga ko ubwo ibi byamaraga kuba (uyu murobyi amaze kurohama) ngo abaturage bo muri aka gace bahamagaye polisi ngo ize guta muri yombi aba bashinzwe umutekano ariko ngo ntibaza.

Aba baturage ngo bafashwe n’uburakari bashaka kwihorera bajugunya mu kiyaga uyu mugabo ushinzwe umutekano (Kyalimpa), gusa ku bw’amahirwe ngo ariruka arabasiga ajya kwihisha.

Aba baturage ngo kugeza ubu bariye karungu ndetse ngo bakaba basabye polisi yo muri aka gace gufata aba bashinzwe umutekano bitaba ibyo ngo bakabihanira ku giti cyabo.

Yashaba Chris, umuyobozi wa polisi ishami rishinzwe iperereza yatangaje ko bashyizeho itsinda ry’abapolisi bagiye gukora ibishoboka byose bagere aho iki gikorwa cyabereye maze ngo bate muri yombi aba bashinzwe umutekano.

Yisangize Inshuti.

Ibitekerezo

Tanga Igitekerezo