Umurambo wa mukuru wa Perezida wa Koreya ya Ruguru wagejejwe mu gihugu cye

Kim Jong nam yishwe muri Gashyantare uyu mwaka

Umurambo wa Kim Jong Nam, mukuru wa Perezida wa Koreya ya Rugurua, Kim Jong Un wagejwe mu murwa mukuru Pyongyang kuri uyu wa Gatanu.

Ni nyuma y’ukwezi n’igice Kim Jong nam yiciwe ku kibuga cy’indege cya Kuala Lumpur muri Malaysia, akicwa n’uburozi yasizwe n’abantu baje bamusatira.

Bivugwa ko urupfu rwa Jong nam rwaba rwarategetswe na murumuna we Jong Un.

Iyoherezwa ry’umurambo wa Kim Jong nam wakurikiwe n’irekurwa ry’abaturage b’ibihugu byombi bari bangiwe kugenda nyuma y’umwuka mubi hagati ya Malaysia na Koreya ya Ruguru.

Jong nam akimara gupfa, Koreya ya Ruguru yahise isaba Malaysia kohereza uwo murambo nta suzumwa rikozwe.

Malaysia yarabyanze, ivuga ko ifite uburenganzira bwo kuwusuzuma ngo hagaragazwe icyamwishe kuko yaguye ku butaka bwayo, ndetse ivuga ko itazatanga uwo murambo mu gihe bizaba bitasabwe n’umuryango wa Jong nam.

Ambasaderi wa Koreya muri Malaysia yavuze ko ibyakozwe ari ugufatira bugwate, Malaysia ihita imwirukana ndetse inahamagaza uwabo muri Koreya ya Ruguru.

Ibiganiro hagati y’ibihugu byombi byarakomeje, none kuri uyu wa Gatanu Minisitiri w’ububanyi n’amahanga wa Malaysia, Anifah Aman yavuze ko umurambo woherejwe.

Abaturage bari babujijwe kugenda ku mpande zombi barekuwe basubira mu bihugu byabo.

Kim Jong nam yishwe amaze igihe atagera mu gihugu cye cya Koreya ya Ruguru, nyuma y’ubwumvikane buke hagati ye na Perezida Kim Jong Un.

Umuryango we wahoze utuye mu mujyi wa Macau mu majyepfo y’Ubushinwa, icyakora nyuma barahavuye bikaba bikekwa ko bari mu bwihisho.

Yisangize Inshuti.

Ibitekerezo

Tanga Igitekerezo