Umupasiteri yashatse guca agahigo nk’aka Yesu birangira ahasize ubuzima

24

Umupasitori yashatse gutera ikirenge mu cya Yesu agerageza kwiyiriza ubusa iminsi mirongo ine biza kurangira apfuye atabigezeho habura iminsi icumi.

Amakuru dukesha ikinyamakuru Mzansistories.com cyandikira muri Afurika y’Epfo aravuga ko umupasitoro witwa Alfred Ndlovu na we wo muri icyo gihugu yasanzwe yapfiriye mu ishyamba nyuma yo kumarayo iminsi 30 (amanywa n’amajoro) atarya atananywa agerageza kwigana Yesu Kirisitu wamaze iminsi n’amajoro 40 atarya atananywa.

Uyu mugabo w’imyaka 44, yavuye mu rugo iwe kuya 17 Kamena 2016 yerekeza mu ishyamba aho yari agiye gutangirira amasengesho ye. Mu buryo bwo kwiyegereza Imana yiyemeje kujya kure y’ibyamubuza gusoza amasengesho ye kuko yashakaga gukora amasengesho y’iminsi n’amajoro 40 atarya atananywa.

Uyu mupasitoro wari uzwi n’abaturanyi ndetse n’umuryango we nk’umugabo ukijijwe ku buryo yavugaga ko ukwemera kwe kumwemerera kunyeganyeza imisozi, urupfu rwe rwabereye ihurizo inshuti ze za hafi ndetse n’abayoboke b’itorero yari ayoboye.

Umwe mu nshuti ze za hafi yagize ati: “Yari umugabo ukijijwe, ni ibyago kuba yarapfuye muri ubu buryo. Nyuma y’ukwezi kumwe twaramubuze ni bwo twumvise inkuru y’incamugongo y’urupfu rwe. Yari afite ubuzima buzira umuze kandi yakoreraga itorero atitaye ku myaka ye.

Mu gihe yageragezaga kwigereranya cyangwa se guca agahigo nk’aka Yesu wamaze amajoro n’iminsi 40 atarya atananywa, Pasitoro Alfred Ndlovu yaje gupfa nyuma y’iminsi 30 yishwe n’inzara kuko nta bundi burwayi yari afite.

Umubiri we waje gusangwa n’abagenzi mu ishyamba ari na bo bahise batabaza polisi y’iki gihugu.

Umuvugizi wa Polisi muri iki gihugu yatangaje ko Pasitoro Ndlovu atari we wenyine upfuye azira kwiyiriza kuko bagiye bakira umubare munini w’abapfa ari cyo bazize gusa akaba yatangaje ko polisi y’igihugu idafite ububasha bwo kubuza abaturage kwiyiriza.

Yisangize Inshuti.

Ibitekerezo 24

  1. 1 | 2 | 3

Tanga Igitekerezo