Umugore wari warashimuswe agatoroka ngo akumbuye uwari umugabo we muri Boko Haram

Amina Ali akikiye umukobwa we n’agahinda kenshi aterwa no kuba atakiri kumwe na sheri we babanaga muri Boko Haram

Umugore wo mu gihugu cya Nigeriya wari warashimuswe ari umwangavu n’abarwanyi bo mu mutwe w’abarwanyi wa Boko Haram aravuga ko akumbuye uwari umugabo we bakiri muri Boko Haram kandi ko urukumbuzi rumumereye nabi.

Amina Ali wari umaze imyaka irenga ibiri mu maboko y’abarwanyi ba Boko Haram akaza kubatoroka aravuga ko yagezeyo agashakana n’umwe muri abo barwanyi ndetse baza no kubyarana umwana witwa Safiya.

Uyu mugore aravuga ko akumbuye umugabo we bidasanzwe ndetse akavuga ko atazahwema kumutekereza kuko ngo yamugumye ku mutima nubwo ngo hashize amezi atatu atorotse inkambi ya Boko Haram bari barimo.

Abasirikare ba Leta ya Nigeriya ni bo basanze uyu mugore na sheri we ndetse n’umukobwa babyaranye bari mu ishyamba ryo muri Nigeriya ryitwa Sambisa, ubwo hari mu kwezi kwa Gicurasi uyu mwaka ubwo bombi bari bamaze gutoroka Boko Haram.

Uyu mugore w’imyaka 21 y’amavuko avuga ko ari bo ubwabo bifatiye umwanzuro wo gutoroka inkambi bari barashyizwemo na Boko Haram.

Amina avuga ko abasirikare ba Leta ya Nigeria atari bo babakuye mu nzara za Boko Haram nkuko byatangajwe ahubwo ngo we ubwe n’umugabo we ni bo bifatiye icyemezo cyo gutoroka inkambi ya Boko Haram.

Umugabo w’uyu mugore wavuze ko yitwa Mohammed Hayatu ubwo basangwaga mu ishyamba yatangaje ko na we yagiye muri Boko Haram ashimuswe ari na yo mpamvu we n’umugore we bagambiriye gutoroka aba barwanyi.

Kuri ubu uyu mugabo afungiye muri gereza y’igisirikare cya Nigeria kugira ngo inzego z’iperereza zimukoreho iperereza ryimbitse.

Amina Ali avuga ko kuri ubu agace arimo atakazi ariko akavuga ko akumbuye umugabo we bidasanzwe kandi ko ababajwe no kuba baramutandukanyije na we.

Ati:" Ntabwo nishimiye gukomeza kuba kure y’umugabo wanjye, ndashaka ko amenya ko nkimutekereza kandi ko nubwo twatandukanyijwe bidasobanuye ko namwibagiwe"


Amina n’umugabo we Muhammed bamenyaniye muri Boko Haram

Amina Ali ni umwe mu bakobwa b’abangavu 276 bashimuswe na Boko Haram mu kigo cy’ishuri aho bigaga muri Mata 2014. Amakuru agera kuri CNN avuga ko kuri ubu 57 muri bo bamaze gutoroka uyu mutwe w’abarwanyi ariko ngo abandi basaga 200 baracyari mu maboko y’abo barwanyi.

Amina Ali avuga ko nyuma yo gushimutwa n’uyu mutwe w’abarwanyi ngo babashyize mu nkambi maze barabigabanya babagira abagore babo. Gusa Amina ngo ajya ababazwa nuko hari bagenzi be yasize mu maboko ya Boko Haram bategereje kwicwa.


Amina ngo kuri ubu ahora afite agahinda kuko atari kumwe n’umugabo we

Yisangize Inshuti.

Ibitekerezo

Tanga Igitekerezo