Umugore wa Perezida Museveni yananiwe kumvisha abamushinja kubeshya

Janet Museveni yananiwe kumvisha abakozi mu makaminuza ya Leta ko basubira mu kazi

Umufasha wa Perezida wa Uganda akaba na Minisitiri w’uburezi, ubumenyi, ikoranabuhanga na Siporo muri iki gihugu, Janet Museveni yananiwe kumvisha abakozi ba za kaminuza bamaze iminsi barataye akazi kubera kutazamurirwa imishahara nkuko bari barabisezeranyijwe na Minisiteri y’uburezi.

Mu minsi ishize ni bwo abakozi bakora mu burezi mu makaminuza ya Leta bahagaritse akazi nyuma yo kutumvikana ku ishyirwa mu bikorwa ry’icyemezo cyo kubongerera umushahara giherutse gufatwa.

Nyuma y’uku guhagarika akazi kw’aba bakozi mu cyumweru gishize, Minisitiri w’uburezi Janet Museveni ndetse n’abandi ba minisitiri bane bahuye n’abahagarariye aba bakozi kugira ngo baganire kuri iki kibazo ariko ibiganiro byabo ntacyo byatanze kuko aba bayobozi bananiwe kumvisha aba bakozi kugira ngo bagaruke ku kazi.

Daily Monitor itangaza ko ibi bisobanuye ko amakaminuza ya Leta agera kuri 5 arimo Makerere, Busitema, Kyambogo, Gulu na Makerere University Business School (MUBS) zizakomeza gufunga imiryango kuburyo abanyeshuri bashya n’abasanzwe bayigamo batazajya kwiga igihembwe cya mbere cy’uyu mwaka w’amashuri.

Mu nama yabahuje kuri uyu wa mbere tariki 8 Kanama 2016 mu biro bya Minisitiri w’intebe, Minisitiri w’uburezi Janet Museveni yavuze ko aba bakozi bakwiye kwihangana bagategereza ko aya mafaranga yabo yongerwa, ariko ngo hagati aho bagomba gusubira mu kazi.

Yagize ati: “Abo (abanyeshuri) ni abana banyu kandi mukwiye kubitaho, mu gihe baba badahari ntimuzabona akazi. Reka twige kuri ibi bibazo neza mu mezi abiri ari imbere inyongera yanyu izaba yaje, ariko mugomba kwemera ibyo gukora.”

Minisitiri Museveni yasobanuriye abo bakozi ko ari mushya muri iyi Minisiteri bityo ngo akaba agiye gusesengura neza ibibazo biri mu bakozi ba kaminuza za Leta abone kuba yabikemura.

Akababaro n’uburakari bw’aba bakozi byazamuwe na none n’uko Minisitiri w’imari muri iki gihugu Matia Kasaija, yababwiye ko amafaranga aba bakozi basaba atashyizwe mu ngengo y’imari y’umwaka wa 2016/2017 ibintu byararakaje cyane.

Ibi byatumye aba bakozi bavuga ko mu gihe iyi Minisitiri izaba itaruzuza ibyo bemeranyijwe ngo batazagaruka mu kazi.

Jackson Betihamah, uhagarariye aba bakozi yagize ati “ Turasaba Leta kwiga ku cyemezo cyayo bidatinze, mu gihe bizaba bidakunze tuzakomeza gushyira ibikoresho byacu hasi, icyo twifuza ni uko amasezerano twagiranye ashyirwa mu bikorwa. Nibatabikora tuzakomeza dushyire ibikoresho byacu hasi.”

Aba bakozi basaba ko bakongerwa umushahara ukangana n’uw’abarimu bigisha muri izi kaminuza.

Aba bakozi barishyuza amafaranga agera kuri Miliyari 56 z’amashiringi ya Uganda bemerewe na Perezida Museveni umwaka ushize, mu rwego rwo kuzamura imishahara yabo.

Byari biteganyijwe ko abanyeshuri bashya b’amakaminuza ya Leta batangira kugera ku mashuri mu mpera z’icyumweru gishize, gusa ngo ibi ntibyashotse bitewe n’uko aya mashuri yari agifunze bitewe n’uko aba bakozi banze kugaruka mu kazi.

Yisangize Inshuti.

Ibitekerezo

Tanga Igitekerezo