Uganda yahagaritse ibyo guhiga abarwanyi n’umuyobozi wa LRA

1

Joseph Lony uyobora umutwe w’abarwanyi wa LRA

Leta y’igihugu cya Uganda yatangaje ko yamaze gutangira gukura ingabo zayo zari muri Repubulika ya Central Africa zigaba ibitero ku barwanyi b’umutwe wa Lord’s Resistance Army (LRA) urwanya ubutegetsi bwa Uganda.

Nkuko Daily Monitor ibitangaza, iravuga ko izi ngabo zakuwe mu birindiro zari zisanzwe zirimo, maze ngo zihurizwa ku birindiro by’ahitwa Obo biherereye mu burasirazuba bw’iki gihugu mbere yo kugaruka muri Uganda.

Umuyobozi w’ingabo muri Uganda, Gen Katumba Wamala, yemeje amakuru y’ikurwa ry’izi ngabo muri Central Africa, ariko yirinda gutangaza itariki nyayo y’igihe izi ngabo zizagarukira mu gihugu cyazo.

Amakuru aturuka mu buyobozi bw’ingabo muri Uganda, aravuga ko izi ngabo zizavanwa muri Obo, maze zijyanwe mu birindiro bya Nzara muri Sudani y’epfo mbere yo kuhava bwa nyuma basubira muri Uganda.

Gusa abahanga mu bya gisirikare bavuga ko iki cyemezo cyafashwe n’igisirikare cya Uganda kitari gikwiye bitewe n’uko ngo gukura batayo ebyiri zarwanyaga ndetse zikanahiga umuyobozi w’izi nyeshyamba Joseph Kony mu myaka itatu ishize, ngo bizarema icyuho ndetse binatange amahirwe kuri aba barwanyi yo kongera kwisuganya ari nako bagaba ibitero ku basivili.

Mu myaka itatu ishize, Joseph Kony byagiye bivugwa ko yihishe mu gace ka Kafia Kingi ko muri Repubulika ya Central Africa, ariko byaje gutangazwa ko yahunze ako gace mbere y’uko ingabo za Uganda zigera muri aka gace, aho byavuzwe ko yihishe mu majyepfo y’intara ya Darfur muri Sudani.

Ntibiramenyekana neza niba itsinda ry’ingabo zo muri Leta zunze ubumwe za Amerika zafatanyaga n’ingabo za Uganda mu guhiga Kony zo zizakomeza ibyo guhiga uyu mugabo nyuma y’uko ingabo za Uganda zikuramo akarenge.

Mu 2010, Leta zunze ubumwe za Amerika yohereje abasirikare 100 badasanzwe bo gufasha ingabo za Uganda mu kurwanya abarwanyi ba LRA.

Mu 2012, umuryango wa Afurika yunze ubumwe yemeje gushyiraho itsinda ry’ingabo ryo kugira ngo rirwanye aba barwanyi, ariko igihugu cya Uganda ni cyo cyabashije koherezayo ingabo naho ibihugu nka Repubulika iharanira Demukalasi ya Congo, Sudani y’epfo ndetse na Repubulika ya Central Africa byo ntibyatanze izo ngabo bitewe n’ibibazo by’umutekano muke biri muri ibi bihugu.

Umutwe w’abarwanyi wa LRA bitangazwa ko ufite abarwanyi babarirwa hagati y’150 na 200, muri bo abasaga 130 bakaba bakoresha intwaro.

Muri aba barwanyi ngo igice kinini cyabo kikaba cyaravuye muri Repubulika ya Central Africa kimukira muri Repubulika iharanira Demukalasi ya Congo.

Joseph Kony yashyiriweho impapuro zimuta muri yombi n’urukiko mpanabyaha rwa ICC, aho ashinjwa ibyaha by’intambara n’ibyibasiye inyoko muntu, kwinjiza abana mu gisirikare ndetse no gufata abagore ku ngufu.

Yisangize Inshuti.

Ibitekerezo 1

Tanga Igitekerezo