Uganda: Umukino wabahesheje itike ya CAN wasize 3 bapfuye, abandi 60 barafungwa

Ibyari ibyishimo byaje kubaviramo amarira nyuma y’impanuka zahitanye abantu batatu

Imodoka ebyiri zari zifite umuvuduko udasanzwe zagonze zica abantu batatu mu bafana bari barimo kwishimira insinzi y’ikipe y’igihugu Uganda Cranes yayihaye itike yo kwerekeza mu mikino ya CAN 2017 nyuma yo gutsinda ibirwa bya Komore igitego 1 ku busa

Uyu mukino wabaye kuri iki cyumweru tariki 04 Nzeri wasize abantu batatu bapfiriye mu mpanuka ebyiri zabaye ku mugoroba ubwo abaturage ba Uganda bishimiraga iyi nsinzi.

Andrew Kaweesi, umuvugizi wa Polisi muri iki gihugu yabwiye Daily Monitor ko abapfuye bagonzwe n’abashoferi batwaraga imodoka barenzwe n’ibyishimo barimo kugendera ku muvuduko udasanzwe banahise bacika nubu bakaba bataraboneka.

Impanuka imwe yabaye ahagana saa moya n’igice z’umugoroba igwamo abakobwa babiri b’abangavu aribo Esther Namyala w’imyaka 17 na Teddy Namalwa w’imyaka 13 ibera ahitwa Kalerwe.

Indi mpanuka yabaye ahagana saa tatu z’ijoro igwamo umugabo witwa Isma Kinubi w’imyaka 50.

Kuri ubu imirambo ya ba nyakwigendera yashyikirijwe abanyamuryango, uretse uwa Kinubi ukiri kwa muganga.

Uretse aba bapfuye, polisi yatangaje ko yafashe abandi bantu bagera kuri 60 bakurikiranweho ubujura na bo bakaba bagiye bafatirwa mu kivunge cy’abantu bishimiraga iyi nsinzi.

Iyi nsinzi yatumye hapfa abantu batatu, ni iy’amateka kuko yahesheje itike ikipe y’igihugu ya Uganda yo kwitabira imikino ya CAN, ibintu byaherukaga kubaho mu myaka 38 ishize.

Uyu mukino wabereye kuri sitade ya Namboole ukaba wari witabiriwe n’abafana bagera ku bihumbi 45 (45,000).

Indi nkuru bijyanye: http://www.makuruki.rw/IMIKINO/article/Ibihugu-16-byabonye-tike-ya-CAN-birimo-na-Uganda-yasubiyeyo-nyuma-y-imyaka-isaga-30

Yisangize Inshuti.

Ibitekerezo

Tanga Igitekerezo