Uganda:Besigye yasabye ko umukuru wa Polisi yegura

Kiiza Besigye, Umuyobozi w’ishyaka FDC ritavuga rumwe n’ubutegetsi bwa Uganda yasabye umuyobozi Mukuru wa Polisi IGP Kale Kayihura kwegura kuko ngo yananiwe gukemura ibibazo by’umutekano mu gihugu.

Hashize iminsi havugwa amabandi yitwaje intwaro mu gihugu cya Uganda, ndetse urugero rwa vuba ni urupfu rwa Andrew Kaweesi wari umuvugizi wa Polisi ya Uganda wishwe n’abantu bitwaje intwaro.

Kuri uyu wa Mbere hari abafashwe muri abo bakekwaho kuba mu dutsiko tw’amabandi yitaje intwaro, berekwa itangazamakuru maze bavuga ko hari abapolisi bafatanya muri ibyo bikorwa byo guhungabanya umutekano.

Aganira n’itangazamakuru, Besigye yavuze ko Kale Kayihura akwiye kwegura, ngo kuko yananiwe kuyobora polisi kugeza aho abapolisi nabo bagira uruhare mu guhungabanya umutekano.

Yagize ati "Niba ubutegetsi bushaka gutabara igihugu, Kayihura akwiye kuvanwa mu kazi.Iyaba ari aho ubutegetsi bugendera ku mategeko yakabaye yareguye.ibi ntabwo abishoboye kandi nawe abifitemo uruhare, ndumva icyaba cyiza rero ari ukwegura."

Polisi yahise ihakana ayo makuru yo kuba hari abapolisi bakorana n’amabandi yitwaje intwaro.

Daily Monitor yatangaje kandi ko Besigye yagarutse ku bikorwa bya polisi byo kwereka itangazaamakuru abafashwe bakekwaho ibyaha, avuga ko ari ihonyorwa ry’uburenganzira bwa muntu.

Yagize ati "Icya mbere bakoze amakosa yo kwerekana abantu bakekwaho ibyaha, bakaberekana nk’abanyabyaha nta rukiko rurabibahamya.Kuba mwerekana abantu batarahamywa ibyaha ni ikintu buri wese akwiye kurwanya."

Besigye yavuze ko atari polisi nk’urwego rw’umutekano rwinjiriwe n’abagizi ba nabi, ngo ahubwo hakwiye amavugurura mu nzego zose z’umutekano.

Yisangize Inshuti.

Ibitekerezo

Tanga Igitekerezo