Uganda: Abantu 55 baguye mu mirwano yahuje Leta n’inyeshyamba za Rwenzori

Abantu 55 barimo abapolisi 14 n’inyeshyamba 41 ni bo bamaze kugwa mu mirwano yahuje inyeshyamba zo mu gace ka Rwenzori na Polisi y’igihugu cya Uganda.

Iyi mirwno yabaye kuri uyu wagatandatu mu karere ka Kasese ko mu gace kiswe ubwami bwa Rwenzori.

Urufaya rw’amasasu rwumvikanye ahitwa Kasese mu masaha ya nyuma ya saa sita kuri uyu wa gatandatu ndetse imirwano ikomeza no mu masaha y’ijoro.

Dailymonitor yatangaje ko izi nyeshyamba zaje gutwika imodoka ya Polisi ziyitwikira ahitwa Kagando mu burengerazuba bwa Bukonzo.

Umuvugizi wa Polisi ya Uganda Andrew Felix Kaweesi yabwiye itangazamakuru kuri iki cyumweru ko abapolisi b’abofisiye 14 bapfiriye muri iyi mirwano ikomeye.

Uretse abo bapolisi bapfuye hari abandi 41 bo mu nyeshyamba na bo bishwe na polisi muri iyo mirwano yabahuje.

Andrew Felix Kawees yavuze ko hatawe muri yombi abayobozi bakuru 15 b’ubwami bwa Rwenzori.

Ubwami bwa Rwenzori burashinjwa na Leta kugira imitwe yitwaje intwaro yinjiwemo na bamwe mu bari abasirikare bagamije kwiyomora kuri Uganda bagashinga Leta yabo yigenga.

Abatuye muri ubu bwami bo ngo bashinja Leta kubima uburenganzira bwabo no kubatesha agaciro, Leta yo ikabihakana.

Bavuga ko ubwami bwabo bwa Rwenzori buyobowe n’uwahoze ari umusirikare ngo bushaka gukora Leta yiswe Repuburika ya Yiira (Yiira Republic) gusa Chimpreports yanditse ko Perezida Museveni we yatangje iyo Repubulika itazigera iba no kuri santimetero imwe y’ubutaka bwa Uganda kuko ngo ababohoje Uganda batakwemera ko icikamo ibice.

Yisangize Inshuti.

Ibitekerezo

Tanga Igitekerezo