Ubudahangarwa bwahawe Grace Mugabe bwamaganywe

Ishyaka ritavuga rumwe n’ubutegetsi bwa Afurika yepfo ryamaganye icyemezo cyafashwe na leta y’iki gihugu cyo guha ubudahangarwa umugore wa Robert Mugabe washinjwaga gukubita umunya Mideli wo muri Afurika y’epfo.

Ishyaka Democratic Alliance (DA) ryasabye ko hakorwa iperereza n’inteko-nshingamategeko. Rishinja leta gukingira ikibaba abo bita inshuti mbi zayo.

Madamu Grace Mugabe w’imyaka 52 y’amavuko, aregwa gukubita umunyamideli Gabriella Engels muri hoteli yo mu mujyi wa Johannesburg. Gusa yaje guhabwa ubudahangarwa na leta ya Afurika y’epfo bimuha uburenganzira bwo kudakurikiranwaho iki cyaha.

Kugeza ubu ntacyo Madamu Mugabe arabivugaho ku mugaragaro, Perezida Mugabe n’umugore we bageze mu murwa mukuru wa Zimbabwe, Harare, ku cyumweru bavuye muri Afurika y’epfo.

Willie Spies, umunyamategeko wunganira umunyamideli Engels, yabwiye BBC ko bazajuririra mu rukiko umwanzuro wa leta y’Afurika y’epfo wo guha ubudahangarwa Madamu Mugabe.
Avuga ko Madamu Mugabe atari akwiye gufatwa nk’umuntu udasanzwe kuko yari yagiye muri Afurika y’epfo ku giti cye.

Yisangize Inshuti.

Ibitekerezo

Tanga Igitekerezo