UBUFARANSA:Itandukaniro rya Politiki ya Emmanuel Macron n’iya Marine Le Pen

Tariki ya 7 Gicurasi Ubufaransa buzarara bubonye Perezida mushya usimbura Francosi Hollande.

Mu bakandida uruhuri batangiye, ubu hasigayemo babiri , Marine Le Pen w’ishyaka Front Nationale na Emmanuel Macron w’ishyaka En Marche!Abo bombi nibo bagomba kuvamo uzayobora Ubufaransa mu myaka itanu iri imbere.

Aba bakandida bose bafite ibyo bari gusezeranya Abafaransa biyamamaza, ibyo bazabakorera bamaze kugera ku butegetsi.Hari ibyo bahuriraho ndetse n’ibyo batandukaniyeho.

Twifashishije ikinyamakuru RFI, dore bimwe mubyo abo bakandida batandukaniyeho ku bijyanye n’imirongo migari ya politike bazashyira mu bikorwa batowe.

Ku bijyanye n’umurimo

Abakandida bose bavuga ko amasaha yo gukora azakomeza kuba 35.Macron gushyikira gahunda yashyizweho na Francois Hollande ijyanye n’umurimo, irimo no kuvanaho amafaranga agenerwa abashomeri, ku bashomeri bapiganiwe imyanya y’akazi inshuro ebyiri bayitsindira bakanga kuyijyamo.

Marine Le Pen we ashaka ko gahunda yashyizweho na Hollande isubirwamo, akibasira abanyamahanga.Ashaka ko bimwe mubyo abanyamahanga bahabwa bigabanywa bigahabwa Abafaransa, nta gisubizo gihamye afite ku kibazo cy’ubushomeri.

Pansiyo

Le Pen yifuza ko imyaka yo guhabwa pansiyo igabanywa ikagirwa 60.Macron we yifuza ko itegeko rya pansiyo risubirwamo, abayifata bose bagahwa uburenganzira bungana ku mafaranga yose bizigamiye.

Imirimo

Macron arifuza kugabanya abakozi ba Leta bagera ku bihumbi 120 hatarimo abaganga, agatanga indi mirimo igera ku bihumbi icumi mu gipolisi ndetse n’ibihumbi bitanu mu bwarimu.

Le Pen arifuza gushyira mu kazi ka polisi, ibitaro na za gasutamo abantu ibihumbi 21 .

Ibibazo by’umuryango

Le Pen yifuza ko uburenganzira bwo gukuramo inda bwaba buke ndetse no kurongora ku bantu bose bikitonderwa.

Macron we arajwe ishinga n’uburenganzira bungana ku bagore n’abagabo, ndetse yavuze ko natorwa azaharanira ko bose bagira uburenganzira bungana ku mishahara.

Ubukungu

Hari ibyo aba bakandida bahurizaho ariko ibyinshi ni ibyo batandukaniyeho.Le Pen ashaka ko inyungu za mbere ziba iz’abenegihugu ndetse yifuza ko bishyirwa no mu Itegeko Nshinga.

Mu rwego rwo gusigasira amafaranga ajya hanze, yifuza gukuraho amafaranga igihugu cye gitanga mu Muryango w’Ubumwe bw’Uburayi ndetse n’agenda ku bimukira, kongera imisoro ku nganda zifite amashami mu mahanga ndetse no gusoresha abakozi b’abanyamahanga.

Macron we ashaka ko ubucuruzi bworoherezwa kandi hagendewe ku mategeko y’Umuryango w’Ubumwe bw’Uburayi.Yifuza ko amabwiriza agenga inganda yagabanywa zigahabwa ubwigenge kandi ukwishyira hamwe kw’inganda cyangwa abantu bashaka gushora imari bigashyigikirwa.

Le Pen yifuza ko umusoro ku mushahara ugabanywaho 10 % ndetse n’umusoro ku nzu ukagabanywa, mu gihe Macron we yifuza ko ahubwo iyo misoro ivanwaho burundu.

Inzego za leta, manda ya Perezida

Le Pen arashaka ko manda ya Perezida iba imyaka irindwi itongerwa kandi akagabanya abagize Inteko Ishinga Amategeko agasigaza kimwe cya gatatu.
Macron we shaka ko Perezida ahabwa manda eshatu, agasaba ko hajyaho itegeko ribuza umwanya uwo ariwo wose umuntu wigeze guhamwa n’ibyaha yakwiyamamariza, Inteko Ishinga Amategeko ikamburwa inshingano z’ubujyanama kandi abo mu miryango y’abadepite n’abasenateri bagakumirwa kwiyamamaza ku myanya itorerwa muri Leta.

Macron kandi na we yifuza ko abagize Inteko Ishinga Amategeko bagabanywa ariko agashyigikira ko Inteko ihabwa ubushobozi buhagije bwo kugenzura Guverinoma.

Abimukira

Le Pen ashaka ko abantu ibihumbi icumi ku mwaka uba umubare ntarengwa ku bashaka kwimukira mu Bufaransa. Ashaka ko hajyaho ibisabwa byinshi ku muntu ushaka ubuhungiro, kubuza ihabwa ry’ibyangombwa ku bimukira batabifite, kwirukana abanyamahanga bakoze ibyaha.

Macron we yumva nta mpamvu bakanga kwakira impunzi, ahubwo agasaba ko umwanya kugenzura abashaka ubuhungiro bitwara ugabanyuka. Macron ashaka ko natorwa hazajyaho gahunda yo kwiga uko abimukira bakirwa mu Bufaransa .Ashaka kandi kujya aha visa abanyamahanga bafite impano zidasanzwe no korohereza kubona akazi abanyeshuri b’abanyamahanga mu cyiciro cya gatatu cya kaminuza.

Igisirikare

Abakandida bose bifuza lo hasubizwaho serivisi z’urugerero rwa gisirikare, icyakora Le Pen avuga ko bajya bamara ukwezi naho Macron akavuga ko bakwiye kumara amezi atatu.

Le Pen yifuza ko Ubufaransa bwahita bugura ubundi bwato bunini bwa gisirikare buzatwa miliyari z’amayero zisaga enye, mu gihe ubwo bari basanganywe bwajyanywe gukoreshwa , bukaba buzongera gukora nibura muri 2019.

Abakandida bose bifuza ko umubare w’abashinzwe umutekano w’igihugu wongerwa.
Macron yifuza ko igisirikare cyajya gihabwa 2% by’umusaruro mbumbe w’igihugu mu mwaka wa 2025, mu gihe Le Pen we yifuza ko bigerwaho muri 2022.

Yisangize Inshuti.

Ibitekerezo

Tanga Igitekerezo