Trump yavuze ko hari Miliyoni z’abatoye batabyemerewe mu matora aherutse gutsinda

Donald Trump uherutse gutorerwa kuba Perezida wa Leta zunze ubumwe za Amerika aravuga ko hari Milliyoni nyinshi z’abantu batoye batabyemerewe mu matora rusange akemeza ko nubwo byatangajwe ko ari Clinton wayatsinze iyo bakuramo abatoye batabyemere na yo yari kuyatsinda bimworoheye.

Trump ni we watsinze amatora ya Perezida wa Leta zunze ubumwe za Amerika nyuma yo gutorwa ku majwi 279 y’intumwa z’ama Leta mu gihe Clinton yari afite 259 y’amajwi yaturutse mu ntumwa 538 zituruka muri Letya zose.

Nubwo Trump yatsinze aya matora ariko, mu matora rusange yari yabanje Clinton yari yamurushije amajwi hafi miliyoni ebyiri nubwo yaje kuburira amahirwe mu batora bahagarariye ama Leta.

Kuri ubu Trump aravuga ko yagombaga kuba yaratsinze no mu matora rusange kuko ngo hari miliyoni nyinshi zatoye mu matora rusange ku buryo butemewe n’amategeko nubwo nta gihamya na kimwe atanga kigaragaza abatoye batabyemerewe nkuko BBC yakomeje ibitangaza.

Ibi Trump arabivuga mu gihe Ishyaka rya Green Party risaba ko ibarura ry’amajwi (y’abahagarariye ama Leta) risubirwamo muri Leta eshatu ari zo Pennsylvania, Michigan na Wisconsin nyuma yo gukeka ko amajwi yaba yaribwe hakoreshejwe ikoranabuhanga.

Trump we yavuze ko atari ngombwa gusubiramo ibarura ry’amajwi ku matora yarangiye maze icyo gikorwa cyo kongera kubara amajwi acyita "Ubusambo butemewe n’amategeko"

Yavuze ko ishyaka rya Green Party ririmo gushyira imbaraga mu gusaba ko amajwi yongera kubarurwa bagamije kubikuramo indonke bazakura mu nkunga barimo gukusanya.

Kuri ubu nubwo ishyaka Green Party ari ryo ryasabye ko amajwi yongera kubaruwa, ishyaka ry’abademukarate na ryo ryabateye ingabo mu bitugu ndetse na Hiraly Clinton yatangaje ko abari inyuma.

Kuri uyu wa gatanu ushyize, Jill Stein wari uhagarariye Green Party urimo guharanira ko ibarura ry’amajwi risubirwamo, yabonye abamushyigikira benshi nyuma yuko ubuyobozi bwa Leta ya Wisconsin bwari bumaze gutangaza ko bwemeje ko amajwi azongera kubarurwa muri iki cyumweru.

Kuri ubu uyu Jill Stein wabonye amajwi angana 1% amaze gukusanya inkunga y’amamiliyoni y’amadorali avuga ko ari ayo gusubirishamo ibarura ry’amajwi, ibintu Trump avuga ko bigamije gukusanya indonke ndetse akavuga ko bitari ngombwa kuko amatora yarangiye ku mugaragaro.

Marc Elias wari uhagarariye ibikorwa byo kwiyamamaza kwa Clinton we yavuze ko ishyaka rye ry’abademukarate nta gihamya bafite cy’uko hari uburiganya bwakozwe mu kubarura amajwi bityo ngo ntabwo ari bo ubwabo basaba ko amajwi asubirwamo.

Icyakora Marc yongeyeho ko biyemeje gushyigikira ishyaka rya Green Party kuko ryabyiyemeje kugirango icyo gikorwa kizagende neza ku mpande zose.

Ibi nibiramuka bikozwe bizaba ari bwo bwa mbere bibayeho mu mateka ya Leta zunze ubumwe za Amerika.

Yisangize Inshuti.

Ibitekerezo

Tanga Igitekerezo