Tanzania: Icyemezo Magufuli yafatiye abanyeshuri babyaye cyateje impaka

Nyuma yuko Perezida wa Tanzania, John Pombe Magufuli, atangaje ko abakobwa babyaye batazongera kwemererwa gusubira mu ishuri, havutse impaka ndende haba mu baminisitiri, mu miryango mpuzamahanga no mu baturage muri rusange.

Perezida wa Tanzania John Pombe Magufuli ku wa kane tariki 22 Kamena nibwo yatangaje ko kuri manda ye nta munyeshuri wabyaye uzongera gusubira mu ishuri.

Magufuri yatangaje ibi nyuma y’iminsi yari ishize abadepite biga kuri iyi ngingo ariko batarayifataho umwanzuro bumva Magufuri atangaje umwanzuro watumye benshi bavuga ko ubangamiye uburengenzira bw’umukobwa no gusumbanya amahirwe hagati y’abakobwa n’abahungu.

Magufuri avuga ko umukobwa wabyaye agomba guhita ajyanwa mu yindi mirimo ibyara inyungu nko gucuruza cyangwa guhinga.

Imiryango mpuzamahanga iharanira uburenganzira bwa muntu yo yavuze ko iki cyemezo kidakwiye gushyirwa mu bikorwa kuko kibangamiye uburenganzira bwa muntu.

Magufuli yavuze ko Tanzania ikomeje kumva ibyo iyi miryango ivuga, byazarangira usanga abanyeshuri bose bafite abana. Magufuli ati: "Dukomeje kumva ibyo iyo miryango mpuzamahanga ivuga, twazisanga buri munyeshuri afite umwana, icyo gihe byagenda gute? mu gihe umwarimu yigisha ugasanga na bo bagiye konsa abana? Ibyo ntibizakorwa kuri manda yanjye. "

Yongeyeho ati: "Niba iyo miryango ifitiye impuhwe abo banyeshuri, nibashakire amashuri yihariye y’abagore. Ariko Guverinoma nyoboye yo ntizemera ibyo"

Nubwo avuga ko guverinoma ayoboye itazemera ko ababyaye basubira kwiga, bamwe mu baminisitiri bagize guverinoma batangaje ku mugaragaro ko badashyigikiye ko umukobwa wabyaye abuzwa amahirwe ye yo kwiga.

Umuryango mpuzamahanga uharanira uburenganzira bwa Muntu, Human Rights Watch, yasohoye raporo kuwa 16 Kamena ivuga ko abayobozi b’ibigo by’amashuri batangiye gusuzuma abakobwa bose bo mu bigo by’amashuri ngo barebemo abatwite babirukane. Ibintu byerekana kubabuza uburenganzira bwo kwiga.

FEMNET, umuryango Nyafurika urengera abagore, wavuze ko Magufuli yari akwiye gukemura ikibazo gituma abantu batera abo bangavu inda aho kubabuza amahirwe yabo bwa kabiri dore ko baba barahohotewe bagaterwa inda batarageza imyaka y’ubukure.

RFI dukesha iyi nkuru yatangaje ko Abantu 100,000 bamaze kugaragaza kuri interinete ko badashyigikiye icyemezo cya Magufuli bamusaba kwisubiraho ku cyemezo yafashe.

Yisangize Inshuti.

Ibitekerezo

Tanga Igitekerezo