Sudani y’Epfo yashyize yemera kohererezwa ingabo zo mu karere

Leta ya Sudani y’Epfo yemeye ko yohererezwa ingabo zo mu karere zijya kubungabunga amahoro n’umutekano muri iki gihugu nyuma y’imirwano ikomeje kuhabera.

Uyu mwanzuro wafashwe kuri uyu wa gatanu mu nama yahuje abakuru b’ibihugu bibumbiye mu muryango wa IGAD (Intergovernmental Authority on Development ) yabaye kuri uyu wa gatanu I Addis Abbeba muri Ethiopiya.

Iyi nama kandi yari yitabiriwe na Perezida Kagame umukuru w’igihugu cy’u Rwanda na Minisitiri w’ububanyi n’amahanga w’u Rwanda Madame Louise Mushikiwabo.

Sudani yemeye ko yongererwa ingabo zicunga umutekano izi zikazava mu bihugu bigize umuryango wa Afurika y’uburasirazuba.

Uyu mwanzuro wari wafatiwe mu nama ya Afurika yunze ubumwe iheruka kubera mu Rwanda mu kwezi kwa Nyakanga 2016 ariko Sudani y’Epfo ikaba itarabyemeraga.

Ntiharamenyekana umubare w’ingabo zigomba koherezwa kubungabunga amahoro muri Sudani y’Epfo.

U Rwanda rwo rusanzwe rufite yo abasirakare ndetse n’abapolisi bagiyeyo mu butumwa bwo kubungabunga umutekano n’amahoro muri kariya gace.

Umutekano muke uri muri Sudani uri guterwa no kutumvikana hagati ya Perezida Salva Kiir wa Sudani na Rieck Machar wahoze visi Perezida w’iki gihugu akaba amaze iminsi mike yegujwe kuri uyu mwanya.

Kugeza ubu abantu abantu benshi bamaze kuhasiga ubuzima abandi bakuwe mu byabo n’iyo mirwano.

Yisangize Inshuti.

Ibitekerezo

Tanga Igitekerezo