Somalia: Al Shabaab yanyonze abantu bagera kuri bane

3

Abarwanyi b’umutwe w’inyeshyamba bavuga ko bagendera ku mahame y’idini ya Islam, Al Shabaab bigambye ko ku mugoroba wo kuri uyu wa gatanu tariki 10 Kamena 2016 banyonze abantu bane bise abagambanyi.

Nkuko uyu mutwe wabitangaje ubucishije kuri radiyo yawo yitwa Al Andalus, wavuze ko aba bantu wishe ubashinja ubugambanyi bakoze baha amakuru yawo ababarwanya barimo Leta ya Kenya ndetse na Leta ya Somalia uyu mutwe ukambitsemo.

Nkuko Reuters ibitangaza, iravuga ko muri aba bantu bane bishwe n’uyu mutwe harimo batatu bishwe barashwe ndetse undi umwe wishwe akaswe umutwe aho we ashinjwa guha amakuru Leta zunze ubumwe za Amerika, byatumye uwari umuyobozi w’uyu mutwe yicwa.

Aba bantu biciwe mu ruhame mu gace ka Bula Fulay gaherereye mu majyepfo y’igihugu cya Somalia.

Umwe mu baturage batuye muri ako gace yatangaje ko bagiye kumva bumva abarwanyi b’uyu mutwe babagezemo babasaba guteranira ahantu hamwe hafi y’ibirindiro by’uyu mutwe.

Yagize ati: “ Twabanje gutekereza ko hari ibyo bagiye kutwigisha, ariko tukigerayo twabonye barasa abantu batatu ndetse undi muntu umwe bamukatiye umutwe imbere yacu.”

Nkuko Radiyo y’uyu mutwe yabitangaje, yavuze ko uyu wishwe akaswe umutwe yitwa Mohamed Aden Nur, w’imyaka 26 y’amavuko washijwaga n’uyu mutwe gukorana bya hafi no guha amakuru abivuganye uwari umuyobozi wabo Ahmed Godane wishwe n’indege yitwara (drone) ya Leta zunze ubumwe za Amerika mu mwaka wa 2014.

Undi muntu wishwe kandi yitwa Muhaydin Hiraab Ahmed wari ufite imyaka 27 y’amavuko, we akaba ashinjwa kuba intasi y’ibiro by’ubutasi bya Leta zunze ubumwe za Amerika ndetse n’igihugu cya Kenya, ndetse akaba yanashijwaga kuba yaragize uruhare mu rupfu rwa Adnan Garaar washijwaga kuba ari we wari uyoboye ibitero byagabwe ku nyubako y’ubucuruzi ya West Gate iherereye I Nairobi mu mwaka wa 2013, wishwe umwaka ushize nawe arashwe n’indege yitwara ya Leta zunze ubumwe za Amerika.

Mu mezi ashize uyu mutwe wakunze gukozanyaho n’ingabo za AMISOM zishinzwe kubungabunga amahoro mu gihugu cya Somalia, aho bagiye bagabanaho ibitero byanagiye bihitana abaturage batari bake cyane cyane mu murwa mukuru Mogadishu ndetse no mu yindi mijyi.

Uyu mutwe watangiye kugaragara mu gihugu cya Somalia mu mwaka wa 2006, ukaba ubarirwamo abarwanyi bari hagati y’ibihumbi 7 n’ibihumbi 9.

Yisangize Inshuti.

Ibitekerezo 3

  1. abantu barapfa nkisazi kweli.ubuse koko amahoro kuriyisi azavahe? Isirarangiye. Twihanganishije imiryango yabuze ababo

Tanga Igitekerezo