S.Africa:Minisitiri yasabye imbabazi ku magambo y’urukozasoni yoherereje umukozi wa Leta

Jeff Radebe, Minisitiri muri Perezidansi ya Afurika y’Epfo yasabye imbabazi ku magambo y’urukozasoni yandikiye umwe mu bakozi ba Leta.

Radebe w’imyaka 64, BBC ivuga ko yoherereje ubutumwa burimo amagambo aganisha ku mibonano mpuzabitsina umukobwa witwa Siyasanga Mbambani w’imyaka 29, ushinzwe gufotora mu itsinda rishinzwe itumanaho rya Guverinoma.

Muri Werurwe uyu mwaka, Siyasanga yahagaritswe ku kazi ashinjwa gushaka kugirana umubano wihariye na Perezida Jacob Zuma ndetse na Visi Perezida Cyril Ramaphosa.Icyakora Siyasanga yarabihakanye.

Uyu mukobwa byabaye ngombwa ko yereka ikinyamakuru Sunday Times ubutumwa bugufi bw’urukozasoni yohererejwe na Radebe ndetse avuga ko aribwo ashobora kuba yarazize.

Mu kwiregura, Radebe yavuze ko yicuza icyatumye yohereza ubwo butumwa, ndetse ngo ntibukwiye ku mugabo nka we wubatse.Yavuze ko asabye imbabazi.

Radebe yavuze ko nta mubano wigeze uba hagati ye na Siyasanga nubwo yamwoherereje ubwo butumwa.

BBC ivuga ko ku Cyumweru Radebe yahuye n’umufasha wa Nyakwigendera Nelson Mandela, Makidizela Mandela ngo amufashe gusaba imbabazi kandi anamugire inama.

Yisangize Inshuti.

Ibitekerezo

Tanga Igitekerezo