ONU irashinja Salva Kiir n’umugaba w’ingabo kuyobora ubwicanyi bwaguyemo benshi

Itsinda ry’impuguke z’umuryango w’Abibumbye ryasohoye icyegeranyo kigaragaza neza ko imvururu zimaze igihe ziba muri Sudani y’epfo zashyamiranyaga leta n’abatavuga rumwe nayo byari biyobowe n’abayobozi barimo perezida Salva Kiir n’umugaba mukuru w’ingabo Paul Malong.

Raporo y’umuryango w’Abibumbye ikiri ibanga yabonywe n’Ibiro Ntaramakuru by’abafaransa (AFP) itangaza ko ibitero byagiye biba byari biyobowe n’inzego nkuru za leta kuko perezida wa repubulika n’umugaba mukuru w’ingabo ari bo bonyine bafite uburenganzira bwo kwemeza ko mu ntambara hakoreshwa indege za gisirikare kandi zikaba zarakoreshejwe hagapfa abasaga 300 mu minsi itatu .

Ibyo bitero byagabwe hakoreshejwe ubwenge budasanzwe kuko ngo bitagaragazaga ko byagizwemo uruhare na leta ahubwo byagombaga kugaragara ko byari ubwirinzi bwo kurwanya ibitero by’abatavuga rumwe na leta ntibinumvikane ko ari ukubangamira ibiganiro by’amahoro byari bimaze umwaka n’igice bitaragera ku mwanzuro ufatika.

Iyi raporo inagaragaza ko iyi ntambara yo muri Sudani y’Epfo imaze imyaka ibiri n’igice, ikanashinja abasirikare ba leta bo mu bwoko bwiganjemo ubw’aba-Dinka gufata ku ngufu abagore n’abakobwa bo mu bwoko bw’aba Nuer. Leta ya Sudani y’Epfo iranashinjwa kugira uruhare mu bitero byagabwe ku bakozi b’umuryango w’abibumbye n’abakozi b’imiryango idaharanira inyungu yatangaga ubufasha ku mpunzi.

Intambara yo muri Sudani y’Epfo yatangiye muri 2013, ubwo Perezida Salva Kiir,yashinjaga umuyobozi w’abatavuga rumwe na leta Riek Machar kushaka guhirika ubutegetsi , hakaba hamaze gupfa abantu basaga ibihumbi icumi ( 10,000 ) na miliyoni ebyiri n’igice bava mu byabo .

Yisangize Inshuti.

Ibitekerezo

Tanga Igitekerezo