RDC:Hahamagajwe imyigaragambyo idasanzwe nyuma y’ishyirwaho rya Minisitiri w’Intebe

Felix Tshisekedi, umuyobozi w’ihuriro ry’amashyaka atavuga rumwe na Leta

Ihuriro ry’amashyaka atavuga rumwe na Leta ya Repubulika Iharanira Demokarasi ya Congo ryahamagaje imyigaragambyo rusange mu gihugu hose kuri uyu wa Mbere, nyuma y’ishyirwaho rya Minisitiri w’Intebe mushya.

Kuwa Gatanu ushize nibwo Perezida Joseph Kabila yashyize Bruno Tshibala ku mwanya wa Minisitiri w’Intebe, mu rwego rwo kubahiriza amasezerano yafatiwe mu biganiro byahuje impande zitavuga rumwe mu Ukuboza umwaka ushize.

Minisitiri washyizweho afite inshingano zo kuyobora igihugu mu nzira y’amatora ya Perezida agomba kuba bitarenze uyu mwaka.

Ihuriro ry’amashyaka ntiryigeze ryemera uwo muminisitiri mushya, rivuga ko yashyizweho na Kabila ku giti cye kandi ntaho bihuriye n’ibyari byemejwe mu biganiro byahuje impande zitavuga rumwe nkuko Radiokapi yabitangaje.

Kuri iki Cyumweru iryo huriro ryahamagaje imyigaragambyo y’amahoro mu gihugu hose igomba gukorwa kuri uyu wa Mbere.

Felix Tshisekedi, umuyobozi w’iryo huriro yavuze ko igamije kwamagana ifungwa ry’abantu binyuranyije n’amategeko ndetse no kutubahiriza ibyemeranyijwe mu biganiro by’umwaka ushize.

Yavuze ko ibyo Perezida Kabila yakoze bitandukanye cyane n’ibyari byemeranyijwe mu biganiro.

Icyakora Polisi ya Congo yasabye ko imyigaragambyo yose ihagarikwa kuko nta burenganzora abayikora babifitiye, kandi ngo irakora ibishoboka byose ikayiburizamo.

Yisangize Inshuti.

Ibitekerezo

Tanga Igitekerezo