Perezida wa Brésil yakuwe ku butegetsi, umusimbura ahita arahira

Dilema Rousseff (umugore) yasimbujwe Temer wahoze ari Visi Perezida

Sena ya Brésil yatoye yemeza ko uwari Perezida Dilma Rousseff ava ku butegetsi kubera ikosa yakoze ryo gukoresha nabi ingengo y’imari no gufata imyenda itemewe mu izina rya guverinoma bigateza ihungabana ry’ubukungu

Abasenateri 61 muri 81 nibo batoye bemeza ko Perezida Dilma Rousseff ava ku butegetsi mu gihe 20 ari bo batoye babihakana.

Ibi byatumye uyu mugore ahita avanwa ku butegetsi kuko icyemezo cyo kumukuraho cyatowe n’abarenga bibiri bya gatatu by’abasenateri byasabwaga ngo asezererwe ku butegetsi.

Michel Temer wahoze ari Visi Perezida w’iki gihugu ni we warahiriye kukiyobora akazakomeza kuyobora kugeza manda ya Rousseff irangiye muri Mutarama 2019

Amaze kurahira,Temer yahise atangaza ko iyi ari intangiriro y’ibihe bishya. Yasabye abaminisitiri be kumufasha kuvuguruza abavuga ko kwirukana Rousseff ari igikorwa cyo guhirika ubutegetsi.

Yavuze ko abaminisitiri bagomba gukorana bya hafi kugirango bazahure ubukungu bwa Brésil bwahungabanyijwe n’amakosa ya Rousseff.

Abari bashyigikiye Rousseff bahise batangira Imyigaragambyo yo kwamagana Temer mu mijyi itandukanye irimo no mu murwa mukuru Brazilia.

Rousseff azize kuba yaragiye akoresha amafaranga y’ingengo y’imari mu bikorwa bitandukanye byo kunezeza abantu bateraniye ahantu hatandukanye nko mu bitaramo byo mu mahoteri n’ahandi agamije kubareshya ngo bazongere bamutore mu matora yabaye muri 2014.

Ibi kandi ngo byakurikiwe nuko yagiye afata imyenda mu izina rya Leta ku buryo butemewe agamije kuziba icyuho yateye mu ngengo y’imari ari byo byatumye habaho igihombo cya Miliyari 60 z’amadorari bigatuma abasaga miliyoni 29 bakomeza kwicwa n’ubukene nkuko Aljazeera yabitangaje.

Gusa Rousseff we ibi arabihakana akavuga ko ari ibinyoma bigamije kumuhirika ku butegetsi byahimbwe nyuma yuko yongeye gutorerwa kuyobora.


Abasenateri ni bo bafashe umwanzuro wa nyuma wo kwirukana Rouseff ku butegetsi


Abashyigikiye Roussef bahise batangira imyigaragambyo yo kwamagana Temer wabaye Perezida mushya wa Brésill

Yisangize Inshuti.

Ibitekerezo

Tanga Igitekerezo