Perezida Zuma yakiriye ubwegure bwa Minisitiri ukurikiranyweho gukubitira umugore mu kabyiniro

Minisitiri muri Guverinoma ya Afurika y’Epfo yaguye ku mirimo ye nyuma yo gushinjwa gukubitira umugore mu kabyiniro.

Mduduzi Manana, Minisitiri w’Uburezi wungirije muri Afurika y’Epfo, yeguye ku mirimo ye nyuma yo kwitaba urukiko mu cyumweru gishize ashinjwa icyaha cyo gukubita umugore bashwaniye mu kabyiniro.

Kuri uyu wa gatandatu, nibwo hagaragaye itangazo rivuye mu biro bya Perezida Zuma rivuga ko ibiro bya Perezida byakiriye ubwegure bwa Manana.

Perezida Zuma nyuma yo kwemera ubwegure bwa Manana yamushimiye akazi yakoze akiri muri guverinoma. Ishyaka akomokamo rya ANC na ryo ryakiriye ubwegure bwe bamushimira akazi yakoze akiri Minisitiri.

ANC ikimara kumva bwa mbere amakuru ku makosa y’uyu muyobozi, yahise itangaza ko yitwaye ku buryo butemewe.

Uyu Manana nyuma yo gukora iki cyaha yasabye imbabazi avuga ko ari icyaha gikojeje isoni. Avuga ko yakubaganiwe ariko akicuza kuba atarihanganye.

Ubwo yitabaga urukiko bwa mbere abanyamakuru bangiwe kwinjira mu cyuma cy’iburanisha ariko nyuma Polisi iza gutangaza ko Manana agomba kuburanishwa nk’abandi bose nta mwihariko ahawe.

Kuri ubu, Manana yaciwe amadorali 375 aba arekuwe by’agateganyo ariko iperereza rirakomeje ku cyaha aregwa.

Yisangize Inshuti.

Ibitekerezo

Tanga Igitekerezo