Perezida Salva Kiir na Riek Machar barashinjwa ubusahuzi

Perezida wa Sudani y’Epfo Salva Kiir (wambaye ingofero) n’uwahoze ari Visi Perezida Riek Machar

Perezida wa Sudani y’Epfo Salva Kiir n’uwahoze ari Visi Perezida Riek Machar barashinjwa kwitwikira imirwano yahitanye benshi bagasahura umutungo w’igihugu.

Raporo nshya yashyizwe ahagaragara kuri uyu wa Mbere na Sentry Group iravuga ko Perezida Salva Kiir, Riek Machar utavuga rumwe na we ndetse n’inshuti zabo za hafi bitwikiriye imvururu zimaze iminsi muri Sudani y’Epfo bagasahura umutungo wa Leta bakawujyana kubaka inzu z’imitamenwa mu mahanga ndetse bakanagura imodoka zihenze cyane.

Muri iyi Raporo yasohotse nyuma y’igenzura rimaze imyaka ibiri, hagaragaramo amagambo agira ati: “Abayobozi b’imitwe ya Politiki ihanganye bagenzuye nabi kandi bitwaza ivanguramoko kugirago bashyigikire imvururu zagiriye akamaro abayobozi bakuru gusa mu guhaza irari ryabo ryo gusahura”

Iyi Raporo igaragaza amafoto ya Perezida Kiir n’umuryango we baba muri Hoteli y’inyenyeri eshanu ndetse n’inyandiko zigaragaza uburyo bakoreshaga umutungo w’igihugu mu kwinezeza no gukora ishoramari ryabo ku giti cyabo.

Ubusanzwe ngo Perezida Kiir agenerwa amadorali ibihumbi 60 ($60,000) ariko mu igenzura ryakozwe n’uyu muryango, ngo ryerekanye ko ibyo yakoresheje birenze kure ibyo agenewe mu bubasha bwe kandi ngo hanagaragaye imwe mu mitungo yagiye kubitsa mu mabanki yo hanze.

Iyi Raporo kandi igaragaza ko abanyamuryango ba hafi ba Perezida Kiir bafite imigabane ihanitse mu masosiyete akomeye harimo acuruza amavuta, acukura amabuye y’agaciro, n’ibindi.

Imibereho yo kwinezeza yagiye iranga Machar na Kiir mu mahanga ngo ni bimwe mu bigaragaza gusesagura umutungo w’igihugu ndetse ngo hanibazwa byinshi ku ihererekanya ry’amafaranga ku ma konti yabo bya buri kanya nk’imwe mu nzira zo kunyereza umutungo wa Leta.

Brian Adeba, umwe mu bakoze iyi raporo, yabwiye Aljazeera dukesha iyi nkuru ko bayikoze bashingiye ku bihamya bifatika bakuye mu igenzura bamazemo imyaka ibiri ndetse ngo banafite impapuro z’amabanki zigaragaza uburyo konti z’aba bagabo zagiye zikoreshwa.

Uyu muryango wakoze ubu bushakashatsi (The Sentry) washinzwe ku bufatanye na Leta zunze Ubumwe za Amerika ukaba ukora ubushakashatsi bugamije kugaragaza no guhindura ibibangamira uburenganzira bwa muntu.

Yisangize Inshuti.

Ibitekerezo

Tanga Igitekerezo